SADC Yokurudzirwa Kusakoka VaMugabe kuMusangano Wayo

Hurumende yeSouth Africa inoti iri kutarisira kuti nyika dzose dzemu SADC dzichange dziri pamusangano wevatungamiri venyika idzi, uyo uchaitwa pakupera kwesvondo muJohannesburg.

Ukowo vemasangano evashandi muSouth Africa, Zimbabwe pamwe nemuSwaziland, vanoti vacharatidzira pamusangano uyu kana VaMugabe naMambo Mswati wekuSwaziland vakakokwa.

Sekutaura kuri kuita mutori wedu wenhau Benedict Nhlapho, masangano aya anoti achaomesera VaMugabe rwendo runo.

Ukuwo vanoongorora zviri kuitika munyika, vanoti hazvina kukodzera kuti SADC ikoke VaMugabe semutungamiri weZimbabwe kumusangano weSADC, sezvo vazhinji, kusanganisira SADC, vakabvuma kuti sarudzo yemutungamiri wenyika haina kufambiswa zvakanaka nehurumende yaVaMugabe.

Vanoona nezvekufambiswa kwemashoko muSADC, Mai Lefa Martin, vaudza Studio 7 kuti SADC haisi kuzonangana nematambudziko ari muZimbabwe chete, uye vati hapana chikonzero chingaite kuti SADC irambidze VaMugabe kuti vange vari pamusangano uyu.

Doctor Temba Shoniwa vanoongorora zvematongerwo enyika, uye vachidzidzisa pa University of Witwatersrand. Carole Gombakomba weStudio7 aita hurukuro naDr Shoniwa avo vanoti zviri nani kuti SADC ikoke vose veZANU-PF neMDC kumusangano uyu, sezvo hurukuro dziri pakati pemapato aya, dzisati dzabuditsa chisungo.

Dzimwe Nhau Kubva kuStudio7...