Muchirongwa chedu chemagitare chesvondo rino, taita hurukuro nemuimbi wemusambo weAfro Jazz unosanganisira dzechinyakare, Rutendo Ngoreta, anozivikanwa neremagitare rekuti Rutendo Jackie, uyo ane dambarefu idzva rinonzi 'Tsvimbo ne Dohwe.'
Rutendo anoti akatanga kuimba mugore ra2005 achishanda nevamwe vaimbi vakasiyanasiyana, kusanganisira vamwe vane mukurumbira saJah Prayzah weMilitary Touch Movement (MTM).
Akaimbawo nemumwe muimbi wekuZimbabwe anoshanda ari kuSouth Africa ane mukurumbira pasi rose, Mr. Brown, muna 2022 vachiridza mimhanzi panhepfenyuro dzemumhanzi dzinoti Trace Africa, Channel O, neMTV Base.
Rutendo akahwina mubairo weWomen In Arts and Culture (Jazz Music) pa2022 ZNCC Manicaland Women in Enterprise Awards.
Pari zvino anoti ari kumhanya nedambarefu rake iri achitenderera kunoridza kumatunhu akasiyanasiyana emunyika.
Your browser doesn’t support HTML5
Vhidhiyo ina Rutendo Jackie
Anoti matambudziko ari mubasa rake anosanganisira kusawana mari dzakakwana dzekuita mimhanzi yakakwenezverwa zvemhando yepamusoro.
Mimhanzi yake inowanikwa pamadanemutande eFacebook, Youtube, Instagram, I tunes ne Spotify, uye vanoda kumutevera vanomubata ipapo.
Anoti anotenda zvikuru vatsigiri vake nekutevera mimhanzi yake nekuenda kunoona achiridza.
Tinokupai chimwe chirongwa chemagitare nemusi weChishanu svondo rinouya.
Kune vaimbi vanoda kuti titaure navo pachirongwa chedu pano pa studio 7 tibatei pa whatsapp nhamba dzinoti +1 202 465 0318.
Your browser doesn’t support HTML5
Hurukuro na Rutendo Jackie