Chikwata che FC Platinum chatambidzwa mukombe wacho weCastle Lager Premier Soccer League nhasi zvichitevera mutambo wacho wekugumisira wemwaka uno.
Chikwata ichi chapedza mwaka uno zvine mutsindo mushure mekurova Cranbourne Bullets 3-0 muMandava Stadium umo chatambidzwa mukombe wachoo.
FC Platinum yapedza iine mapoinzi makumi manomwe nemashanu kubva mumitambo makumi matatu nemina.
Chikwata ichi chine mapoinzi mapfumbamwe pamusoro peChicken Inn, iyo yarovawo Triangle 1-0 nhasi.
Murairidzi weFC Platinum, Norman Mapeza, ari kufara nekutora kwavaita mukombe wakakosha uyu.
Asi aramba kutaura nezvekutamba muCaf Champions League zvichitevera kudzingwa kweZimbabwe munhabvu yepasi rese.
Vatambi vechikwata cheFC Platinum .
Zimbabwe yakadzingwa munhabvu yepasi rese zvichitevera kupindira muhutungamiri hwenhabvu kwebazi rehurumende reSports and Recreation Commission, SRC.
Maneja wevatambi venhabvu, George Deda, ari kurwadzikana nekudzingwa kweZimbabww uku.
Zvichakadaro, mangwana kune Mutambo mukuru weHarare Derby pakati peDynamos neCaps United.
Makore ekare mutambo uyu waitaurwa nezvawo svondo rese asi iko zvino wangove mutambo wemazuva ese.
Dumisani Mpofu, uyo aimbotambira Caps United, anoti kukundwa mumitambo iyi kwairwadza mazuva avo kwete zvaveko iko zvino.
Mimwe mitambo yanhasi yapera seizvi…
ZPC Kariba 3 Herentals 1, Harare City 3 Highlanders 1, Ngezi Platinum 5 Hwahwa 0, Black Rhinos 0 Bulawayo City 0.
Your browser doesn’t support HTML5
SPORTS-KARIATI-SHO 12 NOV 2022.wav