Chikwata cheDynamos chadonhedza mamwe mapoinzi maviri akakosha muhondo yacho yekutora mukombe weCastle Lager Premier Soccer.
Dynamos yaita mangange 0-0 neTriangle muNSS ndokurasa mukana wekudimbura hutungamiri hweFC Platinum neChicken Inn pamusoro petafura.
Izvi zvauya mushure mekunge Dembare svondo rapera yakarohwa 1-0 neYadah izvo zvisiri kufadza vateveri vechikwata ichi.
Dynamos yave nemapoinzi mashanu pasi peFC Platinum iyo iri kutungamira gungano iri nemapoinzi makumi mana.
Mutevedzeri wemurairidzi weDynamos, Gift Muzadzi, anoti vakasatora mukombe weligi uyu vanenge vakundikana muchinangwa chavo chekufadza chaunga chinovatevera.
Mitambo yanhasi yabuditsa zvanga zvisingatarisirwe nevakawanda mushure mekunge Bulawayo Chiefs yarohwa pamusha neCranbourne Bullets iyo inorairidzwa naNesbert Saruchera.
Hwahwa yarovawo Tenax 2-0 muAscot Stadium ndokupinda mumapoinzi gumi nemashanu, yakaenzana neBulawayo City iyo yarova Manica Diamonds 1-0.
Asi rombo rakanaka remurairidzi mutsva weHighlanders Baltermar Brito riri kuenderera mberi mushure mekunge chikwata ichi chaita mangange 1-1 neNgezi Platinum Stars ndokutora poindi yakakosha kunze kwemusha.
Izvi zvauya mushure mekunge akakunda mumutambo wake wekutanga svondo rapera apo Highlanders yakarova Black Rhinos 3-2.
Aimbove murairidzi weMasvingo United Makanyire Mugova Benjamin anoti mutambo weNgezi neBosso wanga uri wemhando yepamusoro.
Highlanders yakwira kusvika pachinhanho chechisere, Ngezi ichiramba iri pachinzvimbo chechinomwe nekuti Triangle yaita mangange 0-0 neDynamos.
Triangle yave nemapoinzi makumi matatu, Ngezi iine mapoinzi makumi maviri nemapfumbamwe.
Kwapera mitambo yanhasi, zvikwata zvina zviri pamusoro-soro zvakamira zvakadai……
FC Platinum. 40 points
Chicken Inn. 37 points
Dynamos. 35 points
Manica Diamonds. 32 points
Zvikwata zvina zviri pasi pasi zvinoti…….
ZPC Kariba. 18 points
Tenax. 17 points
Bulawayo City 15 points
Hwahwa. 15 points
Asi vanotevera mutambo werugby vasakanganwe kuti chikwata chenyika chemaSables chiri kusangana neNamibia neChitatu muma semi fainari eAfrica Cup.