Hurumende Inomisa Kutengesa Mangoda kuMakambani Anoachenesa

Hurumende inoti yambomisa kutengesera mangoda kumakambani emuZimbabwe anochenesa mangoda asati atengeswa nekuti makambani aya ari kutyora mutemo.

Bazi rezvicherwa rinoti makambani aya pachinzvimbo chekuchenesa mangoda aya, ari kuatengesa akadaro, izvo vati hazvisi pamutemo.

Asi makambani aya haasi kufara nedanho ratorwa nehurumende.

Mukuru we Affirmative Action Group, Va Supa Mandiwanzira, vaudza Studio7 kuti nhengo dzavo ndidzo dzamira kutengeserwa mangoda, zvinova zvadzorera zvinhu mumashure.

VaMandiwanzira vati makambani anenge akanganisa ndiwo chete anofanirwa kuiswa pakaoma kwete kuti makambani ose munyika.

Vanoona nezvekufambiswa kwezvirongwa zveCrisis in Zimbabwe Coalition kuchamhembe kwe Africa, Va Dewa Mavhinga, vanoti hurumende iri kuita zvemahumbwe panyaya yemangoda.

VaMavhinga vati pari zvino zviri pachena kuti zvinhu hazvina kumira zvakanaka munyaya dzemangoda ekwaMarange.

Naizvozvo vati hurumende inofanira kumira kutengesera kana makambani ekunze kusvika pava nehwaro hwekutengesa hwakachena.