Vachidiki veZanu PF vaita musangano nevatori venhau pamuzinda webato iri muHarare, apo vataura mazita evanhu vavanoti vari kuita zvehuwori, izvo vanoti zviri kudzosera kumashure hurongwa hwemutungamiri wenyika, VaEmmerson Mnangagwa hwekurwisana nehuwori.
Munyori anoona nezvegwara remusangano muboka revechidiki, VaGodfrey Tsenengamu, vanoti vamwe vevanhu vane mazita ataurwa pamusangano uyu inhengo dzebato ravo reZanu PF, uye vane zvigaro muhurumende nemubato.
Vataurwa ava vanosanganisirawo chipangamazano muhofisi yemutungamiri wenyika, VaJoram Gumbo, avo vari kupomerwa mhosva yekuita zvehuwori pavaive gurukota rezvekutakurwa kwezvinhu, vakambove gurukota rezvemigodhi, VaObert Mpofu, gurukota rezvekushanyirwa kwenyika, Amai Priscah Mupfumira.
Vamwe vari kupomerwa mhosva yekuchinja mari zviri kunze kwemutemo vanosanganisira sachigaro vesangano rinogaya upfu, reZimbabwe Millers Association, VaTafadzwa Musarara, gavhuna veReserve Bank of Zimbabwe, Doctor John Panonetsa Mangudya, VaMlungisi Moyo, VaArtwell Ndlovu, VaWayne Harrington Tinomuda Machakaire, Amai Elizabeth Mutsvangwa, VaNeville Mutsvangwa, pamwe namuzvinabhizimusi VaWicknell Chivayo.
VaTsenengamu vanoti kana vanhu ava vakasabuda pachena vachizvichenura pazvipomerwa izvi vachavatorea mamwe matanhu anokodzera. Vanotiwo kubva neChipiri vachavharira panze vose vanoshandira pamahofisi ebato kusvika vazvichenura.
Studio 7 yakundikana kubata vamwe vevadomwa nemazita ava.
Asi VaJorum Gumbo, vanoti vashamiswa kwazvo nemashoko ekuti vaiita zvehuwori vachiti ivo segurukota havana kana pavakambobata mari mubasa ravo.
VaGumbo vanoti mhosva yaqvari kupomerwa inobva pakutengwa kwendege ina kuMalaysia, idzo vanoti dzakanga dzawanikwa nemutengo uri pasi kwazvo, uye dzakabhadharwa naVamangudya sagavhuna veRBZ.
VaGumbo vanoti havasi kuzoshayiswa hope nenyaya iyi, vachipomera vechidiki ava kuteerera nyaya dzemakuhwa.
Facebook Forum