Accessibility links

Breaking News

Zviri Kuitika muAmerica

Va Trump Vanodomwa Zviri Pamutemo Kumirira Bato reRepublican Party Musarudzo yeMutungamiri weAmerica Muna Mbudzi

VaDonald Trump vari pamusangano webato ravo
VaDonald Trump vari pamusangano webato ravo

Bato riri kutonga muAmerica, reRepublican Party, rakatanga neMvhuro musangano waro mukuru weRepublican National Convention mudunhu reNorth Carolina.

Musangano uyu wadoma zviri pamutemo mutungamiri weAmerica, VaDonald Trump, kuti vamirire bato ravo musarudzo yemutungamiri wenyika ichaitwa muna Mbudzi gore rino.

VaTrump vachange vachitaura mazuva ese kusvika panopera musangano uyu nemusi weChina.

Mumashoko avo ekutanga, VaTrump vatsoropodza masangano enhau eCNN, Fox News, pamwe chete ne MSNBC vachiti masangano enhau aya haasi kubudisa zviri kuitwa pamusangano uyu sezvaakaita pamusangano we Democtratic National Convention, svondo rapfuura.

VaTrump vachange vachizokwikwidzana naVaJoe Biden vebato reDemocratic Party, iro rakapedza musangano waro wekudoma VaBiden zviri pamutemo svondo rapfuura.

Vanoongorora zvematongerwo enyika vakazvimirira, VaPromise Sande, vanoti vanhu vazhinji vakamirira kunzwa zvichataurwa naVaTrump kana zviri zvekubatanidza vanhu, sezvo vachigaronyomba vanhu vanovapikisa vebato reDemocratic Party.

please wait

No media source currently available

0:00 0:03:54 0:00
Pekupinda Napo Kuti Muone Zvamuri Kuda


See all News Updates of the Day

Nhengo dzeBato reRepublican muAmerica Dzoungana neMuvhuro muMilwaukee Kudoma Zviri paMutemo Achamirira Bato muSarudzo yeMutungamiri weNyika

Vachamirira bato reRepublican musarudzo yemutungamiri wenyika, VaDonald Trump.
Vachamirira bato reRepublican musarudzo yemutungamiri wenyika, VaDonald Trump.

Gungano rebato remaRepublican muAmerica, kana kuti Republican National Convention, riri kutanga neMuvhuro uno mudunhu reMilwaukee apo pachadomwa zviri pamutemo VaDonald Trump semunhu achamirira bato iri musarudzo yemutungamiri wenyika ichaitwa muna Mbudzi gore rino.

Pamusangano uyu, uyo uchaitwa kwemazuva mana kusvika musi weChina, ndipowo pachasarudzwa munhu achatewedzera VaTrump musarudzo, kana kuti running mate.

Izvi zviri kuuya zuva rimwe chete VaTrump vapfurwa muchiitiko chekuedza kuvauraya chakaitika mudunhu rePennsylvania neMugovera.

Vanoongorora zvematongerwo enyika uye vakambove sachigaro webato reZanu PF mudunhu reNorth America, Dr. Frenk Guni, vanoti vanoona sekunge gungano iri richangosimbisa humiriri hwaVaTrump pachitariswa chiitiko cheMugovera ichi.

Dr. Guni vanotiwo vanoona sekunge VaTrump vachangonzi vasarudze munhu wavanoda kushanda naye zvineyi nekuti chii chaachaunza musarudzo iyi sezvinombotariswa mune mimwe misangano yadai.

Asi vanoti pachapera musangano uyu vanoona sekuti mapato maviri makuru anokwikwidzana aya anoti reDemoctratic neRepublican achange achi nakurirana nyoka mhenyu pamusoro pekupfurwa kwaVaTrump.

Nhengo zviuru zveviri nemazana maza ndidzo dzinotarisirwa kupinda mumusangano uyu.

please wait

No media source currently available

0:00 0:01:52 0:00
Pekupinda Napo Kuti Muone Zvamuri Kuda

VaBiden naVaTrump Vodzoka muKutsvaga Rutsigiro Mushure meGakava

VaJoe Biden naVaDonald Trump
VaJoe Biden naVaDonald Trump

Vari kukwikwidza musarudzo yemutungamiri wenyika muAmerica, VaJoe Biden naVaDonald Trump vadzoka mukutsvaga rutsigiro zvichitevera gakava ravo rekutanga svondo rapera.

Kutatarika pane dzimwe nguva kwaVaBiden mugakava iri kwaita kuti dzimwe nhengo dzebato ravo dzitange kutsvaga kuti ndiyani angavatsiva achimirira bato ravo musarudzo.

VaDonald Trump vebato reRepublican naVaJoe Biden vebato reDemocrats vakadzoka mukutsvaga rutsigiro zvichitevera gakava rekutanga resvondo rapera, VaBiden vachitarisira kusimbisa vatsigiri vavo kuti vakagadzirira kutonga kweimwe mamwe makore mana zvichitevera kusaita kwavo zvakanaka mugakava iri.

VaBiden vakati, “Ndinokuvimbisai neshoko rangu saBiden, ndingadai ndisiri kukwikwidza zvakare dai ndanga ndisingatendi nemwoyo wangu wese nemweya wangu. Ndinokwanisa kuita basa iri zvechokwadi, zvatiri kurwira zvakanyanya kukura.”

Hurongwa hwaVaBiden hwekuunganidza mari yekushandisa musarudzo hwemukupera kwesvondo wakave mumwe mukana wechikwata chavo kupikisa kushushikana kuri mune dzimwe nhengo dze Democratic Party dziri kuti kukundikana kwavo mugakava kunoreva kuti dzinofanirwa kutsvaga mumwe achamirira bato mutsva.

Mukuru wechikamu chezvematongerwo enyika, cheCenter for Politics, paUniversity of Virginia, VaLarry Sabato vanoti, “Dai panga paine mutsva, ane simba, wechidiki ari kumirira bato reDemocratic, ndinofunga kuti vanhu vaitora mukana uyu munguva isipi kudzivirira VaTrump kunze.”

VaTrump vakati gakava iri rakaratidza kuti sarudzo dzegore rino isarudzo pakati pesimba nehutera.

VaTrump vakati, “Mubvunzo unofanirwa kunge wese achavhota achizvibvunza nhasi hausi wekuti Joe Biden anopona here maminitsi makumi mapfumbamwe ekukakavara, asi wekuti America inopona here mamwe makore mana aJoe Biden asina kutwasuka ari mumuzinda weWhite House.”

VaTrump vakaudza musangano wekutsvaga rutsigiro kuti vanofunga VaBiden vacharamba vachikwikwidza sarudzo.

“Vanhu vakawanda vari kuti zvichitevera gakava remanheru adarika Joe Biden ari kubuda kumakwikwi. Asi chokwadi chiripo ndechekuti, handinyatsotenda hangu mazviri nekuti anokunda vamwe vose musarudzo vebato reDemocrats vavari kutaura nezvavo.”

Vamwe vemubato reDemocrats vari kutaurwa mubato iri kuti vangangotsiva vaBiden ndevari kuvatevedzera musarudzo vari mutevedzeri wemutungamiri wenyika, Amai Kamala Harris, gavhuna wedunhu risina bato ringanzi ndiro rinokunda reMuchigan VaGretchen Whitmer, gavhuna weCalifornia VaGavin Newsom, Gavhuna weKentucky VaAndy Beshear, nagavhuna weIllionis VaJ. B. Pritzker.

Panhengo dzeDemocratic Party idzodzo hapana ari kuti anoda kutsiva VaBiden. Kuchinja vari kukwikwidza pamberi pegungano rebato ravo muna Nyamavhuvhu kunoda VaBiden vabuda mukukwikwidza.

VaSabato veku University of Virginia vanoti, “Vanofanirwa kutoenda kuWhite House vonoedza kuvaonesa (VaBiden) kuti vabude mukukwikwidza, uye vanogona kunetsa kugutsikana nazvo. Uye vanofanirwa zvakare kugutsa Jill Biden. Uye izvi zvinogona kutooma zvakanyanya.”

Mudzimai wemutungamiri wenyika vakaudza musangano wakaitwa mushure megakava kuti murume wavo ndiye munhu akakodzera muAmerica kudarika vamwe vose.

Amai Biden vakati, “Zvamakaona manheru adarika pagakava aive Joe Biden, mutungamiri ane kuvimbika uye hunhu akataura chokwadi. Uye Donald Trump akataura manyepo mushure memanyepo nemanyepo.”

Zvakabuda musarudzo mushure megakava dzakaitwa neCBS News zvinoratidza kuti maDemocrats anovimba kuti VaBiden vanofanirwa kuramba vari munhu ari kumirira bato musarudzo.

Magungano (conventions) emapato ezvematongerwo enyika ndiwo ane basa kune vanovhota kudarika makaka, sekutaura kwemudzidzisi wezvematongerwo enyika paMarquette University, Muzvinafundo Julia Azari.

“Tsvakurudzo dzemhando yepamusorosoro dzenzira dzechizvinozvino mune zvematongerwo enyika pamusoro pekuti ndezvipi zvinoita kuti munhu avhote uye zvichiita sezvinoenderera mberi kuratidza mavhotero evanhu muna Mbudzi dzinoratidza kuti magungano ane basa, asi makakava haana.”

Chikwata chiri kutsvagira VaBiden rutsigiro chakaita musangano weparunhare nenhengo dzeDemocratic National Committee mushure megakava pamusoro pegungano riri kuuya muna Nyamavhuvhu.

Dzimwe nhengo dzekomiti dzakapinda mumusangano wepanhare uyu dzakaudza sangano renhau reAssociated Press kuti musangano uyu wakanyanya kutarisa nzira yaVaBiden yekuti vasarudzwe zvakare uye hauna kuita hany’a nekushoropodzwa kwemabatiro avakaita gakava.

Nyaya iyi maipiwa nemutori wenhau weVOA News, Scott Stearns, makaiverengerwa naJonga Kandemiiri weVOA Studio 7.

Pamberi peGakava reVachakwikwidza, Zvikwata zvaVaTrump naVaBiden Zvomira neNyaya Huru Dziri kutsviriridza muAmerica

Vari kukwikwidzana mugakava remutungamiri wenyika muAmerica, VaTrump naVaBiden.
Vari kukwikwidzana mugakava remutungamiri wenyika muAmerica, VaTrump naVaBiden.

Nyaya inotevera inobva kumutori wenhau weVOA News Veronica Balderas Iglesias muchiiverengerwa naJonga Kandemiiri.

Gakava rekutanga pamakakava maviri evari kukwikwidza musarudzo yemutungamiri wenyika muAmerica, kana kuti debate, riri kuitwa nemusi weChina svondo rino.

Asi mashoko ekutsvaga rutsigiro ari kushandiswa nevari kukwikwidza akanangana nenyaya dziri kutsviriridza dzakadai seyekupinda kwevanhu munyika neyekuwanikwa kwevaive mutungamiri wenyika, VaDonadl Trump vaine mhosva panyaya yekubhadhara mumwe mudzimai mari vachiviga nyaya dzebonde dzatove kutsviriridza nechakare.

America ichamirira kusvika nemusi weChina kuti izive kana kuwanikwa vaine mhosva kwaVaDonald Trump kuchashandiswa senzira yekuvarwisa nayo pagakava iri nevavari kukwikwidzana navo vachimirira bato rema Democrats vari mutungamiri wenyika ari kutsvaga kusarudzwa zvakare, VaJoe Biden.

VaMitch Landrieu, mumwe wemasachigaro echikwata chiri kutsvagira VaBiden rutsigiro nyika yose vakatotaura pamusoro penyaya iyi apo vakabuda paterevhizheni yenhepfenyuro yeNBC neSvondo muchirongwa “Sanganayi neVatori veNhau.”

VaLandrieu vakati, “Asi hazvisi zvekungodaidza Donald Trump kuti musungwa chete, zvinoenda kumaitiro ake, uye zvinoenda kuhunhu hwake. Rangarirai, akanyoresa kuti abhuroka kanosvika katanhatu. Zvinoreva kuti haasingori chete muzvinabhizimusi akashata. Zvinoreva kuti akatokanganisira vadiki vose vaivimba naye kuti vararame.”

VaTrump vanoramba zvipomerwa izvi. Uye vakavimbisa kupikisa kuwanikwa kwavo vaine mhosva nematare.

VaJoe Biden naVaDonald Trump
VaJoe Biden naVaDonald Trump

Apo VaBiden vanga vachigadziririra gakava revari kukwikwidza musarudzo yemutungamiri wenyika riri kuuya iri vasiri kuonekwa, VaTrump vakasarudza kupinda mundima vachitsvaga rutsigiro mukupera kwesvondo.

Vakaonekwa muWashington nePhiladelphia. Havana kumboviga chidokwadokwa chavo chekuda kupinda mugakava, nedzimwe nguva vachibvunza vatsigiri vavo kuti vozvibata sei kana vave kusangana naVaBiden.

VaTrump vakati, “Ndooma musoro nekuchenama here ndichingoti ndiwe mutungamiri akaipisisa munhoroondo, kana kuti ndove munhu akanaka ndodzikama ndichirega achitaura? Toenderana zvakaenzana here? Ndooma musoro here?”

Vangangomirira bato reRepublican musarudzo yemutungamiri wenyika ava vakashandisawo musangano weMugovera kuyeuchidza vavhoti nepavamire panyaya yevauyi vasina magwaro ekuve munyika.

VaTrump vakati, “Saka kubva zuva rekutanga, tichatanga chirongwa chekuburitsa vanhu chikuru kudarika zvose munhoroondo yeAmerica. Hatina imwe nzira.”

VaBiden vakaparura chirongwa chinoomesera vanotsvaga hupoteri kumuganho wenyika uri kuchamhembe.

Asi vakafukunurawo svondo rapera hurongwa hunopa nzira kune vasina magwaro asi vakaroorana nezvizvarwa zveAmerica. Pavakabuda panhepfenyuro yeNBC, mumwe wemasachigaro ekomiti iri kutungamira kutsvagira VaBiden rutsigiro akapomera mhosva yemamiriro ezvinhu pari zvino kuna VaTrump nebato reRepublican.

VaMitch Landrieu vakati, “Muganhu wenyika uri mudambudziko. Uye zvanga zvakadaro munyika muno kwemakore makumi maviri kana makumi matatu adarika. VaJoe Biden pazuva rekutanga, zuva rekutanga, vakatumira hurongwa hwakadzama huri pamusoro pevabvakure kudare reCongress. Asi (vekongiresi) havana chavakaita nezvazvo.”

Kunze kwenyaya yekupinda kwevanhu munyika, zvinotarisirwa kuti VaBiden naVaTrump vachabvunzwa mibvunzo iri pamusoro pedzimwe nyaya dzakawanda dzinonetsa pagakava rekutanga richaitwa nenhepfenyuro yeCNN musi wa 27 Chikumi.

please wait
Embed

No media source currently available

0:00 0:04:46 0:00
Pekupinda Napo Kuti Muone Zvamuri Kuda

Iyo yanga iri nyaya yabva kumutori wenhau weVOA News Veronica Balderas Iglesias yamaverengewa neni Jonga Kandemiiri weVOA Studio 7.

VaBiden, VaTrump Votsvaga Rutsigiro muVavhoti veChitema paZororo reKupedzwa kweHutapwa, reJuneteenth

VaTrump naVaBiden
VaTrump naVaBiden

Musi wa 19 Chikumi izuva rezororo muAmerica rinozivikanwa seJuneteenth, iro rinocherechedza zuva remugore ra1865 apo pakapera hutapwa mumatunhu akambenge abuda mumubatanidzwa wemamwe matunhu emuAmerica, kana kuti Confederate States, munguva yekurwisana kwezvizvarwa zvemunyika iyi.

Mukutsvaga rutsigiro musarudzo yemutungamiri wenyika muAmerica iriko gore rino, vari kukwikwidza musarudzo VaJoe Biden naVaDonald Trump vose vari kuenda kuvavhoti vechitema munguva yeJuneteenth.

Mutungamiri wenyika, VaJoe Biden vebato reDemocrats, vakaita konzati kumuzinda weWhite Haouse yekucherechedza Juneteenth zuva iri risati rasvika.

VaBiden vakati, “Nhoroondo yedu haisingori yekwatakabva, ine ranhasi neremangwana redu." Vakatiwo, "Chakakosha ndechekuti remangwana iri nderedu tese, kwete revashoma vedu.”

VaBiden vakati vavari kukwikwidzana navo musarudzo vari kuedza “kunyora patsva nhoroondo." Vanotizve, "Pane zvipoko zvitsaru zvakapfeka nguwo itsva zviri kuedza kutidzosera kumashure."

Vakaenderera mberi vachiti, "Zvakadaro, vari kutora rusununguko rwenyu, kuomesera vatema kuti vasavhota, kana kuti vhoti yenyu iverengwe." Vatizve, "Kuvhara mikova yemikana. Kurwisa kukosha kwekusiyana kwetsika nemagariro, pamwe nekushanda pamwekushandidzana.”

Chikwata chiri kutungamira kutsvagira VaDonald Trump rutsigiro chakaparura hurongwa hwakanangana nevatema kuti vavhotere VaTrump, kana kuti “Black Americans for Trump,” neMugovera apo vaimbove mutungamiri wenyika ava vakataura nevavhoti vechitema pane imwe kereke mu Michigan.

VaTrump, avo vari kumirira Republican Party, vakati, “Inharaunda yakakosha zvikuru kwatiri." Vakatiwo, "Taita zvakawanda, ndinotaura izvi, kuvatema kudarika vamwe vatungamiri vese kubva kuna Abraham Lincoln. Chinhu chikuru kwazvo ichocho.”

Vakati vavhoti vari kurasikirwa nemabasa zvichikonzerwa nezvavakati “mamiriyoni evabvakure.”

VaTrump vakati, “Dunhu rose rine miganho. Makanzwa nezvazvo. Asi vari kuuya munharaunda dzenyu uye vari kukutorerai mabasa enyu." Vakati, "Vari kukanganisa rudzi rwechi African American, mushure mezvo, kunenge kwave nerudzi rwechi Hispanic Americans kudarika mamwe marudzi ose.”

VaTrump vakati nharaunda dzevatema dziri kukuvadzwa zvakanyanyisa nekuparwa kwedzimhosva pasi pehurumende yaVaBiden.

"Kuparwa kwedzimhosva kwakawanda kuri muno munharaunda dzevatema wechi African American, uye vanhu vakawanda vanondiona, vanoti, vakuru, tinoda kudzivirirwa.

"Tinoda mapurisa kuti ati dzivirire. Tinoda mapurisa kuti atichengetedze. Hatidi kubirwa kana kubatwa kwiyo kana kurohwa, kana kuurayiwa nekuti tinoda kufamba mumigwagwa kunotenga rofu rechingwa.”

Humbowo hune FBI hunoratidza kuti kuparwa kwedzimhosva kune mhirizhonga muAmerica kwakadzikira munyika yose mumaguta makuru nemadiki.

VaBiden vakati vavhoti vechitema vakaita kuti vasarudzwe makore mana adarika, uye vanoda rubatsiro rwavo zvakare.

“Nekuti vavhoti vechitema muAmerica vakavhota, Kamala neni tave mutungamiri nemutevedzeri wemutungamiri veAmerica, nekuda kwenyu." Vanodaro VaBiden.

Vakatizve, "Uku hakusi kuwedzera mashoko. Nekuti makavhota, Donald Trump ave aimbove mutungamiri wenyika akakundwa. Saka nekuda kwevhoti renyu, nevhoti renyu muna 2024, tichaita kuti Donald Trump akundwe zvakare.”

Makore mana adarika, zvikamu zvisere kubva muzana chete zvevavhoti vechitema ndizvo zvakasarudza VaTrump.

Ongororo ye Pew Research yesarudzo dzegore rino inoratidza kuti zvikamu gumi nezvisere kubva muzana zvevavhoti vechitema zviri kutsigira VaTrump, kukwira kwehuwandu gunogona kuita kuve nemusiyano mumatunhu anonetsa kuziva kuti achakunda ndiani anosanganisira Michigan.

Iyo yanga iri nyaya yabva kumutori wenhau weVOA Scott Stearns, yamaverengerwa neni Jonga Kandemiiri weVOA Studio 7.

please wait

No media source currently available

0:00 0:04:33 0:00
Pekupinda Napo Kuti Muone Zvamuri Kuda

Danho reDare reSupreme Court remuAmerica Roita Kuti Nyaya yePfuti Irambe Iri paMwongo muSarudzo yeMutungamiri weNyika

Nyaya yekuvandudzwa kwepfuti dzichiiswa bump stock iri pakati pesarudzo muAmerica.
Nyaya yekuvandudzwa kwepfuti dzichiiswa bump stock iri pakati pesarudzo muAmerica.

Dare repamusorosoro muAmerica reSupreme Court svondo rapera rakabvisa mutemo unorambidza chimwe chinhu chinoiswa papfuti dzakawanda dzisiri zvigwagwa kuti dzikwanise kushanda sezvigwagwa dzichiburitsa mabara akawanda munguva pfupi.

Danho iri rinoita kuti nyaya yepfuti nevane pfuti zvirambe zviri pamusoro mukutsvagwa kwerutsigiro musarudzo yemutungamiri wenyika muAmerica iri kuitwa gore rino. Mutori wenhau weVOA Scott Stearns anotipa nyaya iyi zvizere, iyo yamunoverengerwa naJonga Kandemiiri weVOA Studio 7.

“Bump Stock” zvinhu zvinowedzerwa papfuti mushure mekunge dzapera kugadzirwa izvo zvinodzipa simba rekuburitsa mazana emabara pamineti imwechete.

Zvakarambidzwa kushandiswa nevaive mutungamiri wenyika, VaDonald Trump muna 2018.

VaTrump avo vari kumirira bato re Republican musarudzo, vakati.. “Mangwanani ano, tapedzisawo hurongwa hwekudzika mutemo mutsva unorambidza kuvandudzwa kwepfuti, kana kuwedzerwa ma bump stock.”

Zvichitevera kupfurwa kwevanhu pane imwe konzati ku Las Vegas muna 2017 zvakasiya vanhu makumi matanhatu vaurayiwa.

Munhu akapfura vanhu uyu akashandisa pfuti yakaiswa bump stock kupfura mabara anodarika chiuru chimwe ari pafafitera reimwe hotera.

Mukurasa kwaro mutemo uyu svondo rapera, dare reSupreme Court, iro rine vatongi vakawanda vanotsigira kuchengetedzwa kwetsika dzechinyakare, rakati hurumende yaVaTrump yakashandisa masimba ayo zvisizvo mukurambidza kushandiswa kwezvombo zvakavandudzwa ne bump stocks.

반자동 소총에 부착된 범프 스탁.
반자동 소총에 부착된 범프 스탁.

Danho iri riri kuita kuti nyaya yepfuti inge ichiramba iri pamusoro mukutsvagwa kwerutsigiro musarudzo yemutungamiri wenyika.

Vari kutsvagira VaTrump rutsigiro vakati zvizvarwa zveAmerica zvinofanirwa kuremekedza mutongo wedare repamusorosoro iri.

Musi weChishanu, VaTrump vakaudza vanhu vaive pamusangano wekupemberera zuva rekuzvarwa mu Florida kuti kusarudzwa kwavo kuchachengetedza kodzero yekuve nepfuti iri mubumbiro remitemo yeAmerica kana kuti U.S. Constitution’s Second Amendment.

“Tinofanirwa kuwana vanhu, varidzi vepfuti kuti vavhote. Hamusi kuzokwanisa kuve nepfuti dzenyu kwenguva yakareba kana makasavhota, nekuti vari kuda kutora zvese. Vanoda kutora pfuti dzenyu. Vanoda kutora mabara enyu. Vanoda kutora – vanoda kuparadza kodzore dzenyu dziri mubumbiro remitemo, dze Second Amendment,” Vatrump vakadaro.

VaJoe Biden
VaJoe Biden

Vari kutsvagira mutungamiri wenyika VaJoe Biden rutsigiro vakakurudzira dare reKongiresi kuti ridzorere mutemo unorambidza kushandiswa kwezvinovandudza pfuti izvi.

Mutevedzeri wemutungamiri wenyika, Amai Kamala Harris vakati…. "Kana takafunga nezvematanho achatorwa nevavhoti muna Mbudzi, pane musiyano mukuru kwazvo pakati pepatimire nepane vaive mutungamiri wenyika.

"Ngatisakanganweyi – vaive mutungamiri wenyika vakataura pachena kuti vanhu vanofanirwa kuzvikanganwa, apa vachitaura nyaya yemhirizhonga dzepfuti muAmerica. Saka ngatitoreyi nyaya nehudzamu hwakakosha. Ngatinzwisiseyi kuti tose tinokwanisa kupawo pfungwa dzedu panyaya yakakosha iyi.”

VaDonald Trump veRepublican Party.
VaDonald Trump veRepublican Party.

Vatsigiri vaVaTrump vari mudare re Congress vanotsigira kodzero dzevane pfuti dzekuti vashandise zvivandudza pfuti izvi.

Mumiriri wedunhu re Florida mudare reCongress, Va Byron Donalds vebato re Republican vanoti…

“Chinhu chinowedzerwa papfuti ichi chi bump stock, kana muchikwanisa, chinongove chekubatsira vanenge vakakuwara maoko, vachiri kukwanisa kupfura. Hazvirevi kuti vave kunanga vanhuwo zvavo. Hazvina kumbobvira zvakadaro.”

Vatsigiri vaVaBiden mudare re Congress vanoti danho redare reSupreme Court iri richakonzera kurasikirwa kwehupenyu kwakawedzera.

Mumiriri we California mudare re Congress, VaAdam Schiff ve Democratic Party vakati….. “Pasina kupokana, pachave nenjodzi mune remangwana mukushandiswa kwezvekuvandudza pfuti izvi. Uye tichange tichizozvibvunza kuti ‘izvi zviri kuitika sei? Sei tiri kurarama nezvakadai?’”

Chikamu chimwechete pazvikamu zvitatu zvezvizvarwa zveAmerica ndechevanhu vanoti vane pfuti, sezvakaburitswa nesangano retsvakurudzo rePew Research Center.

Sarudzo dzaMbudzi dzisati dzasvika, dare repamusorosoro riri kutarisirwa kupa mutongo mune imwe nyaya yepfuti, iyi iri nyaya ine chekuita nekodzero dzekuve nepfuti dzevanhu vane mitongo inovarambidza kuve nepfuti nezvikonzero zvekuti vakapara mhosva dzemhirizhonga yemudzimba.

please wait

No media source currently available

0:00 0:05:32 0:00
Pekupinda Napo Kuti Muone Zvamuri Kuda

Iyo yanga iri nyaya yabva kune mutori wenhau weVOA News Scott Stearns yamaverengerwa neni Jonga Kandemiiri weStudio 7.

Rodhai zvimwe

XS
SM
MD
LG