Vechidiki vatatu vebato reMDC T mudunhu reHarare vanosanganisira munyori anoona nezvekudzivirirwa kwemukati menyika muboka revechidiki mudunhu iri, VaTaruvinga Magaya vanonzi vasungwa nemapurisa vakaendeswa kukamba yemapurisa yeHarare Central Police Station.
Vatatu ava, avo vanoti VaTaruvinga Magaya, vanove munyori anoona nezvekudzivirirwa kwemukati menyika muboka revechidiki mudunhu iri, VaGoodrich Muchekera naVaChrispen Mundandi, vanonzi vari kupomerwa mhosva yekukonzera mhirizhonga.
Varume ava vanotarisirwa kumiswa pamberi pematare edzimhosva neChipiri.
Kusungwa kwavo kunotevera kurwiswa kunonzi kwakaitwa vechidiki veMDC T nevanofungidzirwa kuti inhengo dzeZanu PF neSvondo mushure mekunge vaungana mumusha weveruzhinji weKambuzuma 6 kuti vaite musangano wavo.
Mutevedzeri wemutauriri wevechidiki mudunhu reHarare Muzvare Bridget Nyandoro vanoti vanga vasati vanzwa kuti vatatu ava vari kupomerwa mhosva dzipi.
Muzvare Nyandoro vanoti vakarwiswa nevanofungidzirwa kuti inhengo dzeZanu PF pavakanga vachiparura chirongwa chavo che #MyZimbabwe Campaign, izvo muchiitiko chavanoti chakasiya vanhu vanodarika makumi maviri vakuvara, vasere vavo vakapinda muchipatara.
Muzvare Nyandoro vanoti vakatanga vamborwiswa munguva dzemangwanani pavaitenderera nemusha weKambuzuma vachishambadza nezvemusangano wavo, asi vakakwanisa kuzvidzivirira.
“Vakauya vari vashoma saka takakwanisa kuzvidzirira. Asi takazoti tapedza musangano wedu kumanheru vanhu vave kudzokera kudzimba ndipo patakaona motokari dzaibva kuMbare, Machipisa neKuwadzana dzichiuya dzakatakura vanhu veZanu PF, dzichibva dzaenda kumba kwasachigaro weZanu PF ndipo patakatanga kurwiswa,” Muzvare Nyandoro vanodaro.
Vanoti vanhu vakanyanya kurohwa madzimai echikuru. “Vaingotageta madzimai echikuru, zvekuti mumwe mudzimai akatotyorwa gumbo,” vanodaro Muzvare Nyandoro.
Muzvare Nyandoro vanoti nekuda kwekuti mapurisa akanga otosunga nhengo dzebato ravo dzakanga dzarohwa dzakatizira kukamba, havana kuzombomhang’ara nyaya yekurwiswa kwavo iyi.
“Takanzwa kuti mukuru wevechidiki veZanu PF (zita tinaro) ndiye akatoudza mapurisa kuti atishungurudze, saka hapana kwataimbotaura nezvenyaya yedu," vanodaro Muzvare Nyandoro.
