Mutauriri mukuru webato reZimbabwe People First, VaJealous Mawarire vanonzi vari kudiwa kumapurisa edivi reLaw and Order nenyaya inonzi ine chekuita negurukota rezvedzidzo yepamusoro Muzvinafundo Jonathan Moyo.
"Ndaita zvekufonerwa nemumwe mupurisa ati unonzi Inspector Chafa, vakanditi ndiri kudiwa nemapurisa eLaw and Order. Saka ndavabvunzawo kuti ko munondida, nyaya ndeyeyi? Ndiri kuuya semusungwa here kana kuti ndiri kuuya semunhu wamunoda kuti akupeyi humbowo hwezvinhu zvamuri kuferefeta?" VaMawarire vanodaro.
Vanoti mapurisa angovati anovada nenyaya ine chekuita naVaJonathan Moyo, vachiti havana ruzivo kuti VaJonathan Moyo vacho musungwa here kana kuti ndivo vamhang'ara nyaya yavo kumapurisa.
VaMawarire vanoti kunyange hazvo mapurisa aramba kuvaudza zvizhinji pamusoro penyaya iyi, vanofungidzira kuti ine chekuita nemashoko avakazeya naProfessor Moyo nevamwe neChipiri padandemutande reTwitter.
"Ini changopinda mupfungwa ndechekuti, eeh, last communication yandakaita ndakaita pa twitter. Pakanga pane discussion ichinzi Auditor General report yavakapa yakanga isiri accurate.
"Zvino ini ndakangoti aah, kana Auditor General vachinzi vanopa ma report asiri accurate, ko anti-corruption yatinonzwa kunzi iri kukutsvagai VaMoyo, yatinonzwa kunzi iri kukutsvagai nenyaya yekutengeswa kweKingston building yekuna Chinhoyi munotii nayo. Havana kudaira. Ndinezuro uko.... chandazoona nhasi yanga yaanyaya yekunzi ndisvike kuLaw and Order."
VMawarire vanoti vachaenda kunozvipira kumapurisa nemusi weChina mangwanani vachiperekedzwa nemagweta avo.
Asi vanoti kana nyaya yavari kudaidzirwa nemapurisa iine chekuita nezvavakanyora pa twitter, zvinoreva kuti hurumende inenge yatotanga kumbunyikidza vanhu pamusoro pekushandiswa kwemadandemutande, kana kuti social media.