Mapurisa emuHarare asunga murwiri wekodzero dzevanhu, Pastor Evan Mawarire, pavasvika panhandare yendege yeHarare International Airport vachibva nekuSouth Africa.
Magweta ari kumirira Pastor Mwarire anoti vakachengetedzwa pakamba yemapurisa yeHarare Central Police Station kudivi reLaw and Order.
Gweta raPastor Mawarire, VaHarrison Nkomo, vaudza Studio7 kuti ichokwadi kuti VaMawarire vasungwa panhandare yendege yeHarare International Airport.
Mutauriri wemapurisa Senior Assistant Commissioner Charity Charamba vabvuma kuti Pastor Mawarire vasungwa.
Amai Charamba vaudza Studio7 kuti Pastor Mawarire vasungwa nemhosva yekutyora mutemo wechibatiso kana kuti bail, sezvo vakabuda munyika mushure mekunge vabhadhara mari yechibatiso.
Pastor Mawarire vakabuda munyika mwedzi mitanhatu yapfuura vachienda kuAmerica vachiti vaityira hupenyu hwavo mushure mekusungwa vachimiswa pamberi pematare nemhosva yekuratidzira vachishandisa mureza wenyika.
Vanozivikanwa nekuratidzira kwavakatanga gore rapera muhurongwa hwavo hwe #ThisFlag, uhwo hwakapindwawo nevanhu vakwanda vari munyika nekunze kwenyika.
Vakasungwa nehurumende muna Chikunguru gore rapera vachipomerwa mhosva yekukonzeresa mhirizhonga. Asi matare akati VaMawarire vakanga vasina mhosva yavapara.
Sangano reAmnesty International rashorawo zvikuru kusungwa kwaPastor Mawarire uku.
Mutewedzeri wemukuru weAmnesty International kuchamhembe kweAfrica, VaMuleya Mwananyanda, vati mhosva dziri kupomerwa Pastor Mawarire hadzina chokwadi uye kusungwa kwavo uku kwakanangana nekuda kuvashungurudza chete sezvavakamboitwa gore rapera.
Vanoti hurumende inofanirwa kuvasunungura pasina mhosva yavapomerwa, sezvo vari kuitwa musungwa nekuda kwekumirira kodzero dzavo.
Mumwe wevanhu vakashanda naPastor Mawarire, Doctor Noah Manyika, vebato reBuild Zimbabwe Alliance, vanoti vanoshora zvikuru kusungwa kwavo, vachiti havana mhosva yavakapara.
“Chandinongoziva ndechekuti hakuna mwana wemuZimbabwe anofanirwa kuti achidzoka kumba kwake, osvika onzi hanzi izvo tiri kukusunga kana kuti tiri kukuvhunzavhunza nemhaka yekuti wanga uchitaurireyi kuti zvinhu hazvina kumira zvakanaka,” Doctor Manyika vanodaro.
