Rimwe sangano revarairidzi, re Rural Teachers Union of Zimbabwe rinoti riri kuronga kupinda mumigwagwa nemusi wa 29 Kubvumbi richiratidzira pamusoro pekwarinoti kusabatwa zvakanaka kwevashandi vehurumende nehurumende.
Mutungamiri wesangano iri, VaObert Masaraure, vanoti hurumende haisi kuratidza hany’a yekusimudzirawo hupenyu hwevashandi vayo kuburikidza nekusimudzira mihoro yavo kuti ifambiranewo nekurarama kwevanhu kana kuti poverty datum line.
“Matambudziko ese ari munyika tiri kuramba tichisangana nawo kwenguva yakareba. Totoshamisika kunzwa mutungamiri wenyika achitaura ega nemuromo wake kuti kune mari inokwana $15 billion yavasiri kuziva kuti yakafamba sei,” VaMasaraure vanodaro.
Vanoti zvimwe zvavari kunyunyuta nazvo kubatwa kwemari dzinonzi nehurumende ndedze mudyandigere, idzo vanoti dziri kubatwa pasina kuwirirana nevashandi navo.
“Nyaya yema leave days edu, kouyawo ma pension edu ari kungobatwa tisina kuwirirana, kwouyawo nyaya yemiripo yedu isisina date riri certain rekuti pay date racho munotambira musi waani,” VaMasaraure vanotsanangura.
NeMuvhuro mutungamiri wenyika, VaRobert Mugabe, vaka vimbisa kuti hurumende yavo ichaita zvose zvainogona kuti mihoro yevashandi vayo ifambidzane nepoverty datum line, pamwe nekusimudzirawo hupenyu hwavo.
Kuratidzira kwakarongwa uku kunouya panguva iyo zvikoro zviri kutarisirwa kuvhurwa nemusi wa 3 Chivabvu.
VaMasaraure vanoti kuratidzira kwavo uku kuchaitwa vachifora nemumigwagwa yemuHarare vozoenda kuparamende kwavachasiya gwaro renyunyuto.
Mamwe magwaro enyunyuto vanoti vachanoasiya kumahofisi ePublic Service Commission nekubazi rezvedzidzo yepasi pamwe neyepamusoro.
VaMasaraure vanoti vachatorawo mukana uyu kutenda zvizvarwa zveZimbabwe izvo zviri kubatirwa mari dzemitero iri kuzobhadhariswa varairidzi.
Vanoti vachaita izvi kuburikidza nekupa zvidzidzo pachena kuvana vechikoro vari kuitwa zvidzidzo zve Form 1 kusvika Form 4.
