Kunyange hazvo rubatsiro rwakaita sechikafu, nembatya rwuri kunzi rwuri kuunganidzwa kubatsira vakawirwa nedambudziko re Cylcone Idai kuManicaland, vakawanda vanonzi vari kuti havasati vawana rubatsiro urwu.
Mumiriri weManicaland muparamende pasi pehurongwa hwe proportional representation, Amai Lynette Karenyi veMDC inotungamirirwa naVaNelson Chamisa vanoti vari kutambira nyunyuto dzakawanda kubva kuvagari vemunzvimbo dziri kuda rubatsiro, avo vari kuti havasati vawana rubatsiro urwu, zvikuru vekuDzingire nekwaMutyadziya.
Vanoti bato reZanu PF riri kushandisa zvematongerwo enyika mukugoverwa kwerubatsiro urwu, izvo zvavanoti zviri kuita kuti nhengo dzebato ravo dzishaiwe chikafu.
Amai Karenyi vanoti vane humbowo hwekuti chikafu chiri kusvitswa panzvimbo inochengeterwa chikafu yeSilver Stream, asi hachisi kuzoburutswa kubva mumarhorhi anenge auya nacho, ayo vanoti ari kuzoendeswa kusina anoziva.
Amai Karenyi vanoti hurumende inofanirwa kuona kuti yatora matanho akasimba kuitira kuti vanhu vose vawanoswe chikafu.
Asi bato reZanu PF ragara riri kuramba zvipomerwa zvekuti nhengo dzaro dziri kushandisa zvematongerwo enyika mukugoverwa kwechikafu chakanangana nevakawirwa nedambudziko.
Svondo rapera mumiriri weChipinge South muparamende vari nhengo yeZanu PF, VaEnock Porusingazi, vakaramba mashoko mashoko aya, vachiti bato ravo ndiro rakatotangira mamwe mapato ose kupinda munzvimbo dzakawirwa netsaona kunopa rubatsiro.
Facebook Forum