Bato reZanu PF rinoti ratanga hurongwa hwekupikisa zvakakwidzwa kudare repamusorosoro nevakakwikwidza vakamirira mubatanidzwa weMDC Alliance musarudzo yemutungamiri wenyika, VaNelson Chamisa, zvekuipikisa zvakaziviswa neZimbabwe Electoral commission, ZEC zvekuti vaimirira Zanu PF musarudzo iyi, VaEmmerson Mnangagwa ndivo vakakunda.
Mumwe wemagweta ari kumirira VaMnangagwa uye vari munyori anoona nezvemutemo muZanu PF, VaMunyaradzi Paul Mangwana, vanoti ivo nechikwata chavo chemagweta vaedza kunosvitsa magwaro avo kumunyori wezvematare asi vawana mahofisi ake akavharwa sezvo riri zororo remagamba.
Nekudaro, VaMangwana vanoti vachasvitsa magwaro avo kudare nemusi weChitatu.
Mutauriri waVaChamisa, Doctor Nkululeko Sibanda vanoti havashamisike nedanho reZanu PF iri sezvo iri kodzero yemunhu wese, kusanganisira veZanu PF ava, kuenda kumatare vachipikisa zvavanenge vasingawirirani nazvo.
Facebook Forum