Vashandi vehurumende vasunga kumisa kuramwa mabasa kwavanga vachiita vachiti vachadzokera kumabasa kwavo nemusi weChishanu.
Danho iri rinotorwa mushure mekunge varairidzi vawana mari dzavo dzemihoro yaChikumi, ukuwo vanachiremba nevakoti vachitarisirwa kuwanawo mihoro yavo neChishanu.
VaGeorge Mushipe, vanove mutauriri weApex Council uye vachitungamira sangano reZimbabwe Democratic Teachers Union vanoti masangano ose evashandi vehurumende ari gumi nemashanu ari pasi peApex Council awirirana kuti nhengo dzawo dzidzokere kumabasa.
"Chisungo chimwe chataita ndechekuti musevenzi wese wehurumende anofanira kunge ari pabasa because tiri kuona kuti mari dzevadzidzisi dzapinda," VaMushipe vanodaro.
Vanoti kunyange hazvo mari idzi dzapinda, vari kugunung'una kuti dzauya dzakatotorwa zana remadhora riya ravakanga vafanopiwa kuti vabatsirike nechekufambisa vakamirira mihoro yavo.
"Chimwe chisungo chatasunga ndechekuti mari yaJuly uno tiiwanewo muna July muno umu, because takasaiwana muna July muno planning yedu inobva yaenda into disarray," vanodaro zvakare VaMushipe.
Vanoti vashandi vehurumende vabuda pachena kuti kana vakasawana mihoro yavo yemwedzi waChikunguru panopera mwedzi uno vachapinda zvakare mukuramwa mabasa kubva kutanga kwaNyamavhuvhu.
Nekuona kuti zvinhu zvakanga zvaita manyama amire nerongo muzvipatara zvehurumende munyika, hurumende yakazochinja zuva rekutambirisa vashandi vayo vari mubazi rezvehutano kubva kumusi wa14 Chikunguru kudzoka kumusi wa 8 Chikunguru.
Asi VaMushipe vati zvakaitwa nehurumende izvi zvinoratidza kuti ine mari asi haisi kungoda kupa vamwe vashandi vayo paine nguva.
Vanoti pane musangano uchaitwa nemusi weMuvhuro nevamiriri vehurumende uyo unotarisirwa kuti uchazeya nyaya dzakati wandei dzinosanganisira mihoro yaChikunguru.
Zvichakadaro mutungamiri wesangano ravanachiremba reZimbabwe Hospital Doctors Association Doctor Fortune Nyamande vanoti kuratidzira kwavo kuri kuenderera mberi kunyange hurumende yati yave kukurumudza kuvapa mari dzavo dzemihoro.
“Tichatanga tanzwa kubva kunhengo dzedu kuti dzinoda kuti titore matanho api,” Doctor Nyamande vanodaro.
Asi vakafanobata chigaro chegurukota rezvevashandi VaSupa Mandiwanzira vanoti hurumende yavo iri kuedza napose painogona kugadzirisa zviri kunetsa vashandi vashandi.
“Tiri kuzviziva kuti vashandi vedu vari kushupika asi tinoti vatambirewo tsananguro yedu yekuti hurumende haina mari. Kana takangowana mari tinogadzirisa zviri kunetsa vashandi vedu,” VaMandiwanzira vanodaro.