Sangano reApex Council rinoti masangano evashandi vehurumende achiri mushishi yekunzwa pfungwa dzevashandi pamusoro pehurongwa hwehurumende hwekuda kufanopa mushandi mumwe nemumwe zana remadhora semari yekufambisa kusvika vashandi vatambira mihoro yavo.
Izvi zvinotevera kukundikana kubuda nechisungo kwemapoka maviri aya pamusangano wakaitwa neMuvhuro muHarare, izvo zvakaita kuti masangano evashandi ose ari gumi nematatu adzokere kunhego dzawo kunonzwa kuti dzinotambira here kana kuramba chikumbiro chehurumende chekuti dzifanopiwa zana remadhora.
Sachigaro weApex Council, Amai Cecilia Alexander vanoti vane hurongwa hwekusangana nevashandi vose vehurumende neMugovera kuti vanzwewo pfungwa dzavo pamusoro penyaya dzemihoro idzi.
"Nhengo dzemasangano edu ndidzo dzichatipa gwara. Izvozvi taronga kuti tiite musangano navo neMugovera, tivape mukana wekuti vataure pfungwa dzavo," Amai Alexander vanodaro.
Mamwe masangano evashandi vehurumende akaita sereRural Teachers Union of Zimbabwe akatozivisa kare kuti nhengo dzawo hadzisi kuzotambira zana remadhora riri kuda kupiwa nehurumende iri.
