Mutungamiri wenyika, VaEmmerson Mnangagwa, neChishanu vadoma vanhu vavanoda kuti vazove makurukota muhurumende yavo.
Veruzhinji vane maonero akasiyanasiyana pamusoro pevanhu vadomwa ava.
Asi nyanzvi mune zvematongerwo enyika, uye vari chipangamazano paUniversity of Johannesburg kuSouth Africa, Doctor Pedzisai Ruhanya, vanoti pane zvimwe zvavanotenda kuti zvaitwa zvakanaka naVaMangagwa pakushara kwavo makurukota aya.
Asi Doctor Ruhanya vanoti chikuru chinofanirwa kuitwa nehurumende kurwisa huwori kuitira kuti pakwanise kuonekwa basa richaitwa nemakurukota matsva aya.
Doctor Ruhanya vanoti vamwe vevanhu vadomwa semakurukota matsva vanhu vane chiremera muhupenyu hwavo, uye vanoziva mabasa avo.
Vapa muenzaniso wevadomwa segurukota rezvemari nepfumi idzva, Professor Mthuli Ncube, vachiti munhu ane hunyanzvi mune zveupfumi uye anozivikanwa nedzidzo yake.
Doctor Ruhanya vanoti vanoonawo sekunge VaMnangagwa vamboedzawo zvakare kubatanidza matunhu kuburikidza nekutora vanhu kubva kumatunhu ose enyika, pamwe nekutorawo vemarudzi akasiyanasiyana.
Asi vanoti mutungamiri wenyika apotsa pakudoma madzimai mashoma mudare rake panguva iyo vanhu vari kutarisira kuenzaniswa kwemikana pakati pevanhurume nevanhukadzi sezvinokurudzirwa nebumbiro remitemo.
Mumakurukota adomwa aya mune madzimai matanhatu chete pavarume gumi nevana.
Vamwe vadomwa semakurukota ndaAmai Oppah Muchinguri-Kashiri segurukota rezvekudzivirirwa kwenyika,
Kutongwa kwematunhu - VaJuly Moyo
Kudyidzana nedzimwe nyika - VaSibusiso B. Moyo
Mabasa nevashandi - Amai Sekesai Nzenza
Maindaisitiri - VaMangaliso Ndlovu
Mukati menyika - Cain Mathema
Dzidzo yepamusoro - Professor Amon Murwira
Dzidzo yepasi - Professor Paul Mavima
Kurima - VaPerrance Shiri
Migodhi - VaWinston Chitando
Mhando dzemoto - VaJoram Gumbo
Kutakurwa kwezvinhu VaJoel Biggie Matiza
Kuburitswa kwemashoko - Amai Monica Mutsvangwa
Hunyanzvi mukufambiswa kwemashoko -VaKazembe Kazembe
Zviwanikwa pamwe nekushanyirwa kwenyika – Amai Prisca Mupfumira
Zvevechidiki, mitambo netsika – Muzvare Kirsty Coventry
Hutano nekuchengetedzwa kwakanaka kwevana - Dr Obediah Moyo
Mitemo-VaZiyambi Ziyambi,
Madzimai - Amai Sithembiso Nyoni.
Vasiiwa kunze asi vaimbowe makurukota muhurumende yadarika vanoti VaPatrick Chinamasa, VaSupa Mandiwanzira, VaDavid Parirenyatwa, pamwe naVaObert Mpofu.
Vasarudzwa ava vanotarisirwa kutoreswa mhiko nemusi weMuvhuro mushure mekunge vasvitswa matsamba ekuvadoma kuti vatore zvigaro zvavo.
Facebook Forum