Mutongi wedare repamusoro reHigh Court VaDavid Mangota nemusi weMuvhuro vakapa mutongo wekuti muzvare Lynda Masarara avo vange vari mujeri kuChikurubi kwemwedzi inoda kusvika mitatu vasunungurwe.
Muzvare Masarira vakasungwa vachiratidzira vachinzi vaikanganisa vanhu nemotokari kufamba zvakanaka.
Magweta vari nhengo dzeZimbabwe Lawyers for Human Rights VaAndrew Makoni naVaObey Shava vachibatsirwa naVaTendai Biti mukuru webato rinopikisa rePeople Democratic Party vari gwetawo ndivo vange vachivamiririra. VaBiti vanoti vanofara nemutongo uyu vachiti Muzvare Masarira vange votyorerwawo kodzero dzavo.
Zvichakadaro, nhengo dzesangano revadzidzi reZimbabwe National Students Union kana kuti ZINASU dzakasungwa mazuva matatu dzanzi dzidzoke kudare nemusi weChipiri. Mapurisa akasunga vadzidzi gumi nevanomwe.
Vadzidzi ava vakasungwa vachiita musangano kuForestry Industry Training Centre kuPenalonga. Mapurisa ari kupomera mhosva yekutyora mutemo wePublic Order and Security Act kana kuti POSA.
Magweta evadzidzi ava vanova nhengo dzeZimbabwe Lawyers for Human Rights VaTinoziva Bere, VaBlessing Nyamaropa naVaChris Ndlovu vanoti vanhu ava vanofanira kusunungurwa sezvo vakasungwa zvisiri pamutemo.
Magweta aya anoti vadzidzi vechisikana havasi kukwanisa kuona zvinhu zvekuti vachengetedze hutsanana hwavo uye vachityisidzirwa vari muhusungwa.