Nemusi weChipiri muguta reChinhoyi makaita kurwisana kunotyisa pakati pevatsigiri veZanu-PF neveZimbabwe People First.
Bata murefu bata mupfupi yakatanga apo nhengo dzevechidiki dzeZanu PF neZimPF dzakarovana mumhirizhonga iyi.
Vanhu vatatu vanotsigira bato reZimPF vakakuvara mumhirizhonga iyi. Zvinozi mhirizhonga yakatanga apo nhengo dzeZanu PF dzatora svombonoro dzemotokari yanga ichishandiswa mukukokera musangano weZimPF urikutarisra kuitwa neMugovera.
Mumwe wevakuvara ndiVaKudzai Romani avo vanoti vakarohwa apo vakaenda kunonunura imwe nhengo yavo yanga ichirohwa nevechidiki veZanu PF.
Mumwe akarohwa ndiVaPatrick Tsomondo avo vakakuvara pedyo neziso mushure mekurohwa neshangu.
Sachigaro wevechidiki mubato reZimPF mudunhu reMashonaland West VaProsper Gavanga vakashora mapurisa nemabatiro avaita nyaya yekurohwa kwaitwa nhengo dzavo.
Asi nhengo yeZanu PF inoona nezve runyararo VaTommy Mwanza vanoti nhengo dzeZimPF ndidzo dzakavhiringa musangano wavo wavanga vachiita zviri pamutemo. VaMwanza vanoti bato ravo rinocherechedza runyararo pane zvose zvavanoita.
Vechidiki veZimPF vanoti havasi kuzoora moyo uye vacharamba vachikokera musangano wavo weMugovera.
Mapato anopikisa anoti Zanu PF inogara ichikanganisa misangano yavo. Nemusi weMugovera, vechidiki veMDC-T vanoti vakarwisa nevechidiki veZanu-PF kuKambuzuma muHarare.
Svondo rapera kuMarondera nekune dzimwe nzvimbo muMashonaland West vanoti vakashungurudzwawo nevanofungidzirwa kuti ndevechidiki veZanu-PF ava.
Studio 7 haina kukwanisa kubata mapurisa emuChinhoyi kuti tinzwe divi ravo.
