Imwe nhengo yebato reZanu-PF, VaSybeth Musengezi, vakakwira kudare repamusoro, reHigh Court, vachiti musangano wechimbichimbi, wakaitwa neCentral Committee yeZanu-PF muna 2017 ukapinza VaEmmerson Mnangagwa pahutungamiri, wakanga usiri pamutemo, naizvozvo hutungamiri hwaVaMnangagwa hahusi pamutemo.
VaMusengezi, avo vane makore makumi matatu nematanhatu, vanoti vava nemakore makumi maviri vari nhengo yeZanu-PF uye vanoda kuti dare repamusoro rirase zvakabvumiranwa mumusangano uyu, uyo wakaitwa musi weSvondo, 19 Mbudzi 2017, vachiti vanhu vakadoma VaMnangagwa kuti vave mutungamiri webato reZanu-PF vakange vasina kodzero yekudoma VaMnangagwa kana kusheedza musangano uyu, vachiti, naizvozvo hutungamiri hwaVaMnangagwa hahusi pamutemo sezvo pakatyorwa mitemo yeZanu-PF.
VaMusengezi vanotiwo anhu vasingazikanwi uye vanga vasina mvumo yekuita zvose izvi, vanosanganisira VaPatrick Chinamasa naVaObert Mpofu, vakasheedza musangano wechimbichimbi uyu zvisiri pamutemo.
Nyaya iyi haisati yanzvikwa nedare redzimhosva.
Nyanzvi munyaya dzezvemutemo, vachishanda mudunhu reTexas, VaKennedy Masiye, vanoti zvinotaurwa naVaMusengezi zvine chokwadi mukati kana tichitarisa mitemo yeZanu-PF.
Asi mukuru anoona nezvekufambiswa kwemashoko muZanu-PF, VaTafadzwa Mugwadi, vanoti zviri kutaurwa naVaMusegezi marara oga.
Facebook Forum