Mapurisa nemauto ekamba yepa 4-2 Infantry Battalion nemusi weChishanu akadzivisa vagari vekwaGutu kuratidzira.
Vagari ava varikugunun’una nenyaya iri kupomerwa nhengo dzebato riri kutonga reZanu-PF yekuita zvematongerwo enyika mukugoverwa kwechikafu munharaunda yavo.
Sangano reGutu United Residents and Ratepayers Association kana kuti GURRA ndiro range rakaronga kuratidzira kwanhasi. Vagari ava vanoti vari kugovera chiokafu munharauda yavo vari kunyanya kuita zvematongerwo enyika. GURRA yange yaisa chikumbiro chekuratidzira kumapurisa asi mukuru wemapurisa muMasvingo East akaramba kuvapa mvumo.
Vanoona nezvekufambiswa kwe mashoko muGURRA, VaLloyd Mufudze vati vagari vayedza kufamba mumugwagwa vachiratidzira asi vakazodududza mushure mekuona masoja nemapurisa ange akapakatira zvombo achiuya kwavari.
“Mapurisa akaitifonera neChina pakati peusiku achiti tiuye titore mhinduro yedu asi isu hatina kuenda nenyaya yekuti kwanga kwasviba tazoenda nhasi tikawana tsamba ichitirambidza asi isu tange tatokoka vanhu saka tazongoti tienderere mberi ndokuzokoneswa pauya masoja ne mapurisa akapakatira zvombo, vanhu vedu vabva vatiza,” VaMufudze vanodaro.
Vatori venhau veStudio 7 vazosvika paMpandawana masoja ange adzokera kukamba yavo iyo iri pedyo nepa Growth Point. Asi mapurisa ange akapakatira pfuti anga akazara mumigwagwa yose.
Mumwe mugari wekwaGutu VaRusel Mudoro vati vari kutsutsumwa kuti hurumende yavakushandisa mauto kuti apindire munyaya dzevanhuwo zvavo kunova kutyora bumbiro remutemo.
“Pane kutsutsumwa kukuru muvanhu hatisati tamboona mauto achiuya kuzotyora kodzero dzedu vachitirambidza kuita ratidziro yedu, mauto haafaniri kupinda nyaya dzakadai,” VaMudoro vanodaro.
Imwe nhengo yeGURRA VaRichard Madongo vati vashamiswa vave kuona vatungamiri vehurumende ma Gutu voita musangano nemapurisa, masoja pamwe nevasori.
“Isu ve GURRA tange tichida kunyutira kunyimwa kwatiri kuitwa chikafu tichinzi tino supporter ma opposition party, MDC nemamweweo. Vatitadzisa kudaro tashamisika vakuita musangano wavo uye nhasi kwauya vakuru vemapurisa kubva kuMasvingo,” VaMadongo vanodaro.
VeGURRA vati vari kutaura nemagweta avo eZimbabwe Lawyers for Human Rights kuti vaende kudare repamusoro kuti vapihwe mvumo yekuratidzira sezviri mubumbiro remutemo. Vanoona nezvekuburitswa kumashoko mumapurisa nemauto varamba kutaura neStudio 7 nezvedanho ravo rekurambidza vanhu kuratidzira.
Asi mumaguta akaita seBulawayo, Harare neMutare mapurisa ari kurambidza vanhu kuratidzira achiti ane humbowo hwekuti pane vari kuda kupandukira nyika.
Asi vanopikisa vanoti uku kutyora bumbiro remutemo rinobvumidza vanhu kuratidzira murunyararo.
