Vatungamiri vesangano rinomirira vashandi vehurumende, reApex Council vari kutarisirwa Chitatu chesvondo rino kuita musangano nevamiriri vehurumende wekuzeya mashandiro evashandi vehurumende, pamwe nemihoro yavo, iyo inonzi yave pasi kwazvo zvichienzaniswa nemamiriro ezveupfumi.
Musangano uyu wakanga uchitarisirwa kuitwa neMuvhuro , asi sachigaro veApex Council, Amai Cecilia Alexander vanoti vazoziviswa nehurumende kuti wave kuitwa neChitatu.
Vanoti nyaya iri pamusoro penhaurwa yavo inyaya yemari inofanirwa kunge yave kutambirwa nemusandi wehurumende wepasi, iyo vanoti inofanirwa kunge yave chiuru nemazana manomwe emadhora pamwedzi ($1700.00).
Amai Alexander vanoti chimwe chavanotarisira kukurukura pamusangano uyu inyaya yemari dzemabhonasi evashandi vehurumende, idzo vanoti vashandi vanosungirwa kuwana zvisineyi nezvikonzero zvingadai zvichipiwa nehurumende.
Vanoti vari kuita zvekunzwa kuburikidza nemapepanhau kuti vashandi vachawana mabhonasi avo, saka vanotarisira kunzwa kuhurumende paimire panyaya iyi musi wavachasanga.
Facebook Forum