Accessibility links

Breaking News

Hurumende Inozivisa Vose Vakawirwa neTsaona muMigodhi kuKadoma


Zimbabwe Council Of Churches yaita munamato muKadoma wekurangarira vakawirwa netsaona mumigodhi yekuBattlefields, kuKadoma.
Zimbabwe Council Of Churches yaita munamato muKadoma wekurangarira vakawirwa netsaona mumigodhi yekuBattlefields, kuKadoma.

Hurumende yazivisa mazita evanhu vose makumi maviri nevana vakafa mutsaona yemumugodhi kuBattlefields kuKadoma mushure mekunge mvura yapinda mumigodhi miviri usiku hweChipiri svondo rapera.

Bepanhau reChronicle rinoti vakashaika mutsaona iyi ndiJabulani Moyo wekuBattlefields kwakare; Josias Muzadzi (45) wekuZhombe; Liberty Koke (26) wekuGokwe; VaAugustine Chindoza (39) wekuBikita; Wellington Kwari wekuKadoma; Takanda Mushore (27) wekuKwekwe; Tobias Takaendesa, wekuKadoma; Winston Muziribo (22) wekuGokwe; Mayana Bvunzawabaya (27) wekuGokwe; Misheck Ncube (30) wekuMudzi; Keith Muderedzi (31) wekuKadoma, naEborn Kaseke (24) wemubhuku rekwaMatarutse kuMarondera.

Vamwe vakafa mutsaona iyi vanoti Thulani Sibanda (18) wekuKwekwe; John Mufakose (29) wekuGokwe; Norman Billion (39) wekuKadoma; Andrew Mharadze (26) wekuGokwe; Tinashe Shanda (22) wekuGokwe; Givemore Munyengeri (42) wekuBattlefields; Trynos Zindonye (31) wekuGokwe; Clever Takaendesa (47) wekuShurugwi; Tafadzwa Mubaiwa (22) wekuGokwe; Tinei Tembo (31) wekuBattlefields; Charles Jacob (25) wekwaMurehwa, naDavid Martin (38) wekuKadoma.

Gurukota rezvekutongwa kwematunhu, VaJuly Moyo, avo vashanyira nzvimbo iyi, vazivisawo kuti hurumende inofunga kuti yakwanisa kuburitsa vanhu vose makumi matatu nevaviri vapenyu nevakafa, vaive mumugodhi weJongwe Cooperative Mine, vachitiwo panofungidzirwa kuti mune mumwe mugodhi weCricket Number 3 Mine munogona kunge muine vanhu vana vangadai vakavharirwa.

Izvi zvinouya panguva iyo sangano remakereke, reZimbabwe Council of Churches, ZCC, raita munamato muKadoma wekurangarira vakashaya mutsaona iyi pamwe nekunyaradzana nehama neshamwari dzevakasha ava nevakapona mutsaona iyi.

Vanoona nezvezvirongwa musangano reZCC, VaFambai Ngirande, vanoti sangano ravo ranga richibatsirana nemamwe mapoka anosanganisira mapurisa, nevanonunura vanhu munjodzi vari kuita basa rekutsvaga vanhu pasi pemigodhi iyi kubva paitika tsaona iyi.

Pahuwandu hwevanhu vangadai vakanga vari pasi panguva yakaitika tsaona iyi, VaNgirande vanoti zvinonetsa kuti vanhu vatambire kuti migodhi miviri iyi ingadai yaingove nevanhu makumi matatu nevatanhatu chete panguva iyi.

Hurukuro naVaFambai Ngirande
please wait

No media source currently available

0:00 0:03:05 0:00
Pekupinda Napo Kuti Muone Zvamuri Kuda

Facebook Forum

XS
SM
MD
LG