Vatsigiri venhabvu muZimbabwe vari munyika dzakasiyana siyana vanoti havasi kufara nekushaikwa kwemakambani anobatsirawo nhabvu munyika zvikuru kutsigira sangano rePremier League Soccer.
Vamwe vatsigiri ava vachitungamirwa nemutambi wenhabvu Alois Bunjira vatanga chirongwa chinonzi “Econet Save Our Football Campaign” painternet paFacebook.
Econet yakarega kutsigira PSL makore mashanu apfuura mushure mekunge gungano renhabvu iri ratadza kuti CAPS irege kutsigirwa neNetOne iyo inokwikwidzana neEconet munyaya dzenharembozha.
Sangano renhabvu rePremier Soccer League gore rino harina kuwana rutsigiro izvo zvaita kuti vatsigiri vatange chirongwa chitsva ichi chekuyedza kukwezva makambani emunyika kuti abatsire kusimudzira nhabvu.
Bunjira anoti zvinosiririsa kuona mararamiro arikuita vamwe vatambi vanemukurumbira sezvo vasina mari yekubata chouviri zvichitevera kushaya rutsigiro kurikuita zvikwata zvemunyika.
Bunjira anoti vatambi vazhinji vanopedzesera vave kurarama hupenyu husina kururama kunyangwe zvazvo vatambi ava vaine hunyanzi uye mukurumbira mukuru.
Bunjira anotizve vatambi vazhinji vepasi rose vanoremekedzwa uye vanotambira mari zhinji inova batsira kuti vararame zvakanaka asi izvi hazvisati zvave kuitika muZimbabwe.
Nyaya yehuoriwo munhabvu iri kuitawo kuti vembani akawanda vaore moyo.
