Vaimbova mutungamiri wenyika VaRobert Mugabe vari kutarisirwa zvekare nhasi kuti vauye kuzopa huchapupu kukomiti yeparamende inoona nezvemigodhi nezviwanikwa panyaya yehuori hunonzi hwakaitika pakutengeswa kwemangoda ekwaMarange.
Pavaive mutungamiri wenyika VaMugabe vakati hurumende yainge yarasikirwa nemari inosvika mabhiriyoni gumi nemashanu mukutengeswa kwemangoda.
Svondo rapera VaMugabe vakadaidzwa kukomiti iyi asi vanonzi vakakundikana kuuya.
Sachigaroi wekomiti iyi, VaTemba Mliswa vakati VaMugabe vari kutarisirwa kuuya kukomiti iyi nenguva dza 2 masikati. Munyori wedare reparamende VaKennedy Chokuda vanoti vari kuyedza kuti vape VaMugabe tsamba yekuti vauye kuzopa huchapupu wavo.
Hatina kukwanisa kunzwa kubva kuna VaMugabe kuti vachaenda here kunopa huchapupu.
Facebook Forum