Chikwata chekiriketi chekuSouth Africa chiri kutarisirwa kusvika munyika kupera kwaChikumi apo chichatamba mitambo ye One Day Internationals ne Twenty20 muHarare.
vanoona nezvekuburitswa kwemashoko muZimbabwe Cricket, va Jeffrey Murimbechi, vanoti mitambo iyi ichashandiswa kutsvaga vatambi vechidiki vanehunyanzvi vachazotambira chikwata chepamusoro cheNational Team.
Mune imwe nyaya sangano reZimbabwe Cricket rinoti harisati ratora danho kuti richavhota seyi pasarudzo yemutungamiri mutsva we International Cricket Council, ichaitwa mwedzi uno uya.
Asi mapepanhau mazhinji ari kuti South Africa ne Zimbabwe hadzisi kufarira kuti vaimbove mutungamiri weAustralia, vaJohn Howard, vavhoterwe semutungamiri we ICC.
Managing Director veZimbabwe Cricket, va Ozias Bvute, vanoti sangano ravo harisati rabuda nechisungo chekuti sachigaro wavo, va Peter Chingoka, vachavhota seyi pasarudzo iyi.
Muongorori wemitambo yekiriketi, va Wellington Dangarembizi vanoti kuvhoterwa kwavaHoward kungango konzera mutauro sezvo vachizogona kuwunza zvematongerwo enyika mumitambo izvo zvisingazo batsiri zvikwata zvemuAfrica.
