Vatungamiri venyika dzemuSADC kusanganisira mutungamiri wenyika VaEmmerson Mnangagwa nhasi vari kutarisirwa kupeta musangano wavo wepagore kana kuti SADC summit kuTanzania.
Vatungamiri ava vari kutarisirwa kubuda nezvisungo zvinobata nyika dzekuchamhembe kweAfrica idzi.
Nezuro, mutungamiri weTanzania VaJohn Magufuli avo vanenge vave sachigaro weSADC vakazivisa kuti SADC inoda kushanda kuti zvirango zvakatemerwa Zimbabwe neAmerica, Britain nenyika dziri mugungano reEU zvibviswe.
Danho iri ratambirwa nemufaro nasachigaro wekomiti inoona nezvekudyidzana nedzimwe nyika mudare reparamende vari nhengo yeZanu-PF vachimirira Makonde VaKindness Paradza.
Asi VaMagufuli vari kushorwa nevanopikisa nevanorwira kodzero dzevanhu nekusakoshesa nyaya dzekutyorwa kwekodzero dzevanhu.
Sangano reCommitee to Protect Journalists kana kuti CPJ rakurudzira VaMagufuli neSADC kuti vaone kuti kodzero dzevatori venhau dzaremekedzwa.
Sangano iri rati harisi kufara nekutsakatika kwemumwe mutori wenhau muTanzania Azoy Gwanda uye kusungwa kwevamwe vatori venhau munyika iyi nekumbunyikidzwa kwekodzero dzevamwe muZimbabwe, Zambia, Mozambique, DRC nedzimwe nyika dzemuSADC.
Bato rinopikisa rainge ratumira mumwe mutevedzeri waro VaWelshman Ncube nemunyori anoona nezvekudyidzana nedzimwe nyika, Muzvare Gladys Hlatywayo kumusangano weSADC uyu.
Vaviri ava vadzoka munyika. Muzvare Hlatywayo vanoti vari kuda kuti SADC ione kuti muZimbabwe maitwa nhaurirano kupedza dambudziko rezvematongerwo enyika.
Facebook Forum