Gurukota rinoona nezvevashandi nemagariro akanaka evanhu Muzvinafundo Paul Mavima vanoti vana vose vekuMt Hampden pedyo neHarare vange vachichengetwa nagogo Onai Nhiwatiwa paruoko rwaMwari Children’s Trust vakadzoserwa kuvabereki vavo avo vave kubatsirwa nehurumende nechikafu.
VaMavima vanotiwo vakataura nekanzuru yeZvimba Rural kuti iwanire madzimai aya nzvimbo yekuvakira musha wekuchengeta nherera kana vanyoreswa zviri pamutemo.
Vana munzvimbo iyi vanonzi vari kunonga svosve nemuromo vamwe vachiroodzwa vari vadiki uye vakawanda vari kukundikana kuenda kuchikoro. Nzvimbo iyi yakazara zvitangwena uye vakawanda havashande.
Asi vamwe vane ruzivo nezviri kuitika vanoti bazi rezvemagariro evanhu riri kutatarika kuti ribatsire vana ava.
Pakamboendawo mutori wenhau weStudio 7 Kiri Mudzamiri kunzvimbo iyi mwedzi wapera, gogo Nhiwatiwa avo tisina kukwanisa kubata pataenda pamh vakati vaingoda rubatsiro kwete kutorerwa vana ava.
Asi vachitaura neStudio 7, VaMavima vanoti dambudziko iri ragadziriswa uye vakurudzira gogo Nhiwatiwa kuti vanyorese zviri pamutemo.
Facebook Forum