Hukama hweZimbabwe neAmerica hwakatonyanya kuenda kumawere neChipiri apo mumiriri weZimbabwe muAmerica, VaMachivenyika Mapuranga, vakataura mashoko asina kunaka kumunyori mubazi rekudyidzana neAfrica muhurumende yeAmerica, VaJonnie Carson, pamabiko ekupemberera kuumbwa kwesangano reAfrican Union muWashington DC paRitz Carlton Hotel.
Vacahitaura pamabiko aya VaCarson vakati Zanu-PF iri kuramba ichikanganisa hutongi wejechetere munyika, uye kutyora chibvumirano cheGPA.
Asi vasati vapedza kutaura, VaMapuranga vanonzi vakasimuka vakavaudza kuti vaitaura semuranda akanaka wevachena asingadi kushora varungu. VaCarson chizvarwa cheAmerica vari munhu mutema kana kuti Africa-American.
VaMapuranga vakabva vaburitswa panze nevanochengetedza runyararo asi vakaenderera mberi vachitizve America haifi yakapamba Zimbabwe.
Asi vamiriri vedzimwe nyika dzemuAfrica vanonzi vakabva vasveveredza VaMapuranga vachibuda pamwe nevashandi vemuzinda weZimbabwe muAmerica.
Takundikana kubata VaMapuranga pamwe nemutauriri webazi rezvekudyidzana kweZimbabwe nedzimwe nyika, VaSamuel Mhango, avo vanzi vange vari mumusangano.
VaPedzisayi Ruhanya vanoongorora nyaya dzezvematongerwo enyika, uye vachishanda nesangano reCrisis in Zimbabwe Coalition. VaRuhanya vanoti VaMapuranga havana kuita zvinotarisirwa kubva kumiriri weZimbabwe muAmerica.
