Accessibility links

Breaking News

Zviri Kuitika muAmerica

VaJohn Lewis Vanoradzikwa kuAtlanta, Georgia

Vemauto vachipinza VaJohn Lewis mukereke yeEbenezer Baptist Church vasati vanoradzikwa

VaJohn Lewis, avo vaimirira dunhu reGeorgia muparamende ye America, vakachengetwa nezuro, China, 30 Chikunguru, 2020.

VaLewis vakashaya muAtlanta, Georgia, musi wa 17 Chikunguru mushure mekurwara negomarara.

Vange vave nemakore makumi masere.

Kwemasvondo maviri kubva zvavashaya, VaLewis vange vachiendeswa kunzvimbo dzakasiyanasiyana kuti vanhu vayenekane navo gwekupedzisira. Vakave mutema wekutanga kurara muCapitol Rotunda vanhu vachisarisana navo.

Pakuchengetwa kwavo, vaimbove vatungamiri veAmerica vatatu, vanoti President George Bush, President Bill Clinton na President Barack Obama, vakaungana nevanhu vazhinji vakange vachichengeta VaLewis.

Vaimbove mutungamiri weAmerica, VaJimmy Carter, vakatumira mashoko enyaradzo vachitsananguravo kuti vakange vachida kuve pakuchengetwa kwaVaLewis asi vatadziswa nehutano hwavo.

Vanoongorora zvematongerwo enyika, Doctor Frenk Guni, vanoti zvakaitika pakuchengetwa kwaVaJohn Lewis hazvisati zvamboitika muAmerica, zvikuru sei makudzirwo avakaitwa uye huwandu hwevaimbove vatungamiri veAmerica vakange varipo.

please wait

No media source currently available

0:00 0:04:53 0:00
Pekupinda Napo Kuti Muone Zvamuri Kuda


See all News Updates of the Day

Zvematongerwo Enyika Zvinonzi Zvanyanya Mukurwisa Coronavirus muAmerica?

Nyanzvi munezvehutano pasi pose dzirikutsvaka mushonga wekurwisa coronavirus

Bazi reCenters for Disease Control and Prevention (CDC), razivisa kuti hutachiwana hwe coronavirus hunogona kuramba huri mumhepo kwenguva yakareba.

Izvi zvinotevera kubudiswa kwemashoko padandemutande reCDC aiti vanhu vasina zvinoratidza kuti vangave necoronavirus havana chikonzero chekuenda kunovhenekwa.

CDC yakaramba mashoko aya ichiti vekumahofisi emutungamiri wenyika, White House, vakange vaisa mashoko aya padandemutande reCDC vasina kuvazivisa.

Nyanzvi munezvehutano, Doctor Frenk Guni, vanoti kuvhurwa kwenzvimbo dzekudyira, mabhawa nedzimwe nzvimbo dzinoungana vanhu kuri kunetsa vanachiremba nekuti vanhu havagoni kudya vakapfeka ma’mask’ izvo zvinozokonzera kubviswa kwawo apo vanhu vanenge vachidya panzvimbo imwe chete.

please wait

No media source currently available

0:00 0:03:47 0:00
Pekupinda Napo Kuti Muone Zvamuri Kuda


Vazhinji Vorwadzwa neKushaya Kwa Amai Ruth Ginsburg

Justice Ruth Bader Ginsburg

Justice Ruth Ginsburg, avo vakashaya nemusi we Chishanu mu Washington DC, vakange vari mudzimai wechipiri kuve mutongi wedare remu America re Supreme Court. Amai Ginsburg vakaita mukurumbira zvichibva mukusimudzira kwavo nekuchengetedza kodzero dzevanhu, pamwe chete nekurwisa kuti vanhukadzi vapiwe ruremekedzo mumabasa rwakafanana nerwe vanhurume uye kuti zvipingamupini zverusarura ku vanhukadzi zvibviswe. Amai Ginsburg vakaberekwa musi 15 Kurume mugore ra 1933, mu New York, vakashaya mu Washington DC nemusi we Chishanu vave nemakore makumi masere nemanomwe. Nyanzvi mune zvematongerwo enyika, vachidzidzisa pa Wellesley College kuMassachusetts, Doctor Chipo Dendere, vanoti vanhukadzi vazhinji, kusanganisira ivo, vari kunetseka zvikuru nerufu rwa Amai Ruth Ginsburg sezvo vakakonzera kuzururwa kwemisuwo mizhinji kuti vanhukadzi vakwanise kuita zvese zvavakange vachida kuita sezvaiitwa ne vanhurume.

please wait

No media source currently available

0:00 0:02:39 0:00
Pekupinda Napo Kuti Muone Zvamuri Kuda


Dare Rinomisa Bazi reU.S. Postal Service Kuita Shanduko Dzinokanganisa Mafambiro eMatsamba

Mukuru weU.S. Postal Service VaLouis DeJoy

Mutongi wedare repamusoro reAmerica neChina akatara mutongo unomborambidza boka rinoona nezvekufambiswa kwetsamba muAmerica, reUnited States Postal Service kuisa shanduko dziri kunzi nematunhu inokanganisa kufambiswa kwetsamba nenguva.

Mutongi vedare renyika yose, Judge Stanley Bastian vachitonga vari kuYekima kudunhu reWashington, vakati vachapa mutongo uchabata nyika yose panyaya yakakwidzwa nematunhu gumi nemana achipikisana nemutungamiri wenyika VaDonald Trump, mukuru webazi rematsamba, VaLouis DeJoy, pamwe nebazi rematsamba reU.S. Postal Service pamusoro pedanho rakatorwa muna Chikunguru rekushandura mashandiro ebazi iri.

Vachitura mutongo wavo, Judge Bastian vakati matunhu aya aratidza pachena kuti vari kupomerwa mhosva vane chekuita chine zvematongerwo enyika mukuda kukanganisa kufambiswa kwematsamba kwakanaka, zvinogona kukanganisa kufambiswa kwetsamba dzekuvhota musarudzo dza 2020 mumatunhu aya.

Matunhu aya anonzi aida kuti U.S. Postal Service imanikidzwe kusiya danho rayo rekuti kana dai motokari dzisina chadzakatakura dzisiye mamamwe matsamba kana nguva yadzo yekusimuka yasvika, uyewo kuti bazi iri ridzosere imichina yose yarakanga rabvisa.

Chizvarwa cheZimbabwe VaTim Muringai vari mudunhu reOhio vanoti mutongo uyu wakanaka sezvo uchiratidza kuti munyika mune hutongo hwejekerere.

Vati kunyange hazvo vawanikwa vaine mhosva ava vachikwanisa kupikisa mutongo uyu, matare emuAmerica anoshanda nemazvo.

Hurukuro naVaTim Muringai
please wait

No media source currently available

0:00 0:03:06 0:00
Pekupinda Napo Kuti Muone Zvamuri Kuda


Dunhu reOregon Nderimwe reMatunhu Aparadzwa neMoto kuMawirira eAmerica

APTOPIX California Wildfires

Vanhu vanodarika makumi maviri vanonzi vaurayiwa nemoto waparadza masango mudunhu reOregon riri kumawirira kweAmerica. Moto uyu unonzi wasiyawo zviuru nezviuru zvevamwe vanhu vamanikidzwa kutiza misha yavo, iyo iri kusara ichiparadzwa nemoto uyu.

Mamwe matunhu ari kumawirira kweAmerica anoti Washington State neCalifornia ari mudambudziko remoto wesango uyu, uko vanhu vane chitsama vaurayiwawo vakawanda vachitizawo misha yavo.

Moto uyu unonzi wave nemazuva vanodzimura moto vachinetseka kumisa kupararira kwawo.

Vashandi vanodzimura moto vanodarika zviuru makumi matatu vanonzi vari mubishi kuedza kudzimura moto uri kuparadza mzvimbo dzakawanda kumawirira uyu.

MuOregon moto uyu unonzi wapisa maeka anodarika miriyoni imwechete.

Chizvarwa cheZimbabwe chiri muguta reEugene mudunhu reOregon, uye ari muimbi ane mukurumbira, Doctor Thomas Tafirenyika Mukanya Mapfumo, vanoti kunyange hazvo ivo vari kure nekune moto uyu, guta ravo rakavharirwa neutsi hutema huri kuita kuti vasaone zuva kwemazuva.

Doctor Mapfumo vanoti nekuda kwehutsi uhwu, vari kutogara vakazvivharira mudzimba, zvikuru munguva ino yechirwere cheCovid-19.

Nyanzvi munze zvehutano dzinonzi dziri kukurudzirawo veruzhinji kuti vasafema hutsi uhwu dzichiti hunogona kuwedzera dambudziko rechirwere cheCovid-19.

Hurukuro naDoctor Thomas Mapfumo
please wait

No media source currently available

0:00 0:02:38 0:00
Pekupinda Napo Kuti Muone Zvamuri Kuda


America Yocherechedza Makore Gumi neMapfumbamwe Yarwiswa neMatororo

Zvivakwa zveTwin Towers zviri muNew York ndeimwe yenzvimbo dzakarwiswa nemagandanga musi wa11 Gunyana 2001 muAmerica.

America yacherechedza makore gumi nemapfumbamwe yarwiswa nematororo echikwata che al-Qaeda achishandisa ndege ina dzaakapamba akadonhedza mangwanani emusi waGunyana 11 mugore ra2001 munzvimbo dzakasiyanasiyana munyika.

Nekuda kwechirwere cheCovid-19, gore rino vanhu havasi kuungana sezvaisimboitika makore adarika.

Asi mutungamiri wenyika yeAmerica, VaDonald Trump, pamwe nevari kumirira bato reDemocratic Party musarudzo yemutungamiri wenyika VaJoe Biden, vashanyira munguva dzakasiyana nzvimbo yakadonhera imwe yendege idzi mudunhu rePennsylvania.

Mutewedzeri wemutungamiri wenyika, VaMike Pence vashanyirawo New York.

Zvimwe zvizvarwa zveZimbabwe zviri muguta reNew York zvinoti zvichiri kurangarira zvakaitika muguta iri apo vanhu vakawanda vakaurayiwa pakaputswa zvivakwa zveTwin Towers zvaive muguta iri.

VaTamburayi Gwekwerere, avo vari muNew York, vanoti mitemo mizhinji yakashandurwa neAmerica zvichitevera chiitiko ichi, izvo zvakaomesera vabvakure kunyanya.

“Takawona mitemo mizhinji ichisandurwa muAmerica, nyanya inoita nezve vabvakure nevapoteri, mushure mechiitiko ichi. Asi chinofadza ndechekuti America yakakwanisa kugadzirisa nzvimbo dzakapwanywa idzi uye vanoenderera mberi nekurangarira vakarasikirwa nehupenyu hwavo nemhuri dzakasara, “ VaGwekwerere vanodaro.

Hurukuro naVaGwekwerere
please wait
Embed

No media source currently available

0:00 0:02:31 0:00
Pekupinda Napo Kuti Muone Zvamuri Kuda


Rodhai zvimwe

XS
SM
MD
LG