Zviri Kuitika muAmerica
Muimbi R Kelly Anowanikwa Aine Mhosva Dzose Dzaakapomerwa
Muimbi ane mukurumbira pasi pose, Robert Sylvester Kelly, uyo anozivikanwa nezita rekuti R Kelly, atarisana nekuvharirwa mujeri kwehupenyu hwake hwose.
Dare redzimhosva rakatonga R Kelly nezuro muBrooklyn, New York, rakamuwana aine mhosva dzose dzaakange achipomerwa, dzinosanganisira kuita zvepabonde nevasikana vasati vabva zera, kumanikidza vanhukadzi nevasikana vasati vabva zera kuita zvepabonde, kuronga nevamwe vake kutsvaka vanhukadzi nevanasikana vasati vabva zero kuti vaite zvechifambi uyewo kumanikidza vanhukadzi nevasikana vasati vabva zera kuti vagare naye pamba pake ivo vasingadi.
Kwemakore mazhinji, R Kelly akange ari muimbi ari pamusoro pevamwe vaimbi venziyo dze Rhythm & Blues.
Dzimwe nziyo dzakaitisa R Kelly mukurumbira dzinosanganisira "I Believe I Can Fly", "Bump N' Grind" nedzimwe zhinji uye akawana mibaiyiro yakawanda.
Kwemakore akawanda vaimbi vazhinji, varume nevakadzi nevadiki, vaiedza kuti R Kelly avabatsirewo kuti vabudirire mubasa rekuyimba.
Mumwe wevasikana vechidiki ava ainzi Aaliyah, uyo akaita mukurumbira akazofa mutsaona yendege.
Bepanhau reChicago Sun Times rinoti R Kelly, uyo akanga aine makore makumi maviri nemanomwe (27) nemwana musikana waakange achidzidzisa zvekuimba ainzi Aaliyah Dana Haughton, akange aine makore gumi nemashanu (15), vakachata muchivande muna 1994 mushure mekubudisa kwa R Kelly magwaro ainyepa zera raAaliyah.
Izvi zvinonzi apa R Kelly aiedza kuvharidzira mhosva yekupa nhumbu mwana akange asati abva zera.
Aaliyah akashaya mutsaona yendege kuBahamas muna 2001, aine makore makumi maviri nemaviri asi matare edzimhosva akanga agura muchato wake kuna R Kelly.
Kubva kumakore eku ma1990, pakange pane mitauro pamusoro pezvakanga zvichinzi zviri kuitwa naR Kelly kuvanhukadzi nevana vasati vabva zera.
Kunyangwe hazvo vanhu vaiziva zvakanga zvichiitwa naR Kelly, havana kutaura pachena kusvika muna Ndira 2019 apo pakabudiswa firimu, Surving R Kelly, raitaura pamusoro pevanasikana vasina kubva zera vakaitiswa zvepabonde uye vanhukadzi vakamanikidzwa kugara mumba maR Kelly vasingadi.
Dare redzimhosva rakatonga nyaya iyi razivisa kuti richapa mutongo waR Kelly musi wa4 Chivabvu gore rinouya.
Nyanzvi munezvehutano hwepfungwa, kana kuti Mental Health, Doctor Gadziro Gwekwerere, vanoti pane zvidzidzo zvizhinji zvatinowana pamuimbi R Kelly, vachiti munhu anotarisirwa zvepamusoro anogona kurasa chivimbo chevanhu vanovimba naye.
Vanoti veruzhinji vanofanirwa kuziva kuti kuita mukurumbira kwemunhu hakurevi kuti munhu anenge akanaka.
See all News Updates of the Day
- Blessing Zulu
VaBiden Voshora VaTrump neKukonzera Kusagadzikana muAmerica neKuramba Kutambira Zvakabuda Musarudzo yeMutungamiri weAmerica
America yasvitsa neChina gore rimwe chete kubva zvakaitika mhirizhonga inotyisa padare reCongress muWashington DC vatsigiri vevaive mutungamiri wenyika, VaDonald Trump, vachiramba kutambira zvainge zvabuda musarudzo yemutungamiri wenyika zvichitevera kukunda kwakaita VaJoe Biden vebato remaDemocrats.
Dzimwe nyanzvi munyaya dzezvematongerwo enyika dzinoti chiitiko ichi chakasiyana America isisina chiremera pasi rose panyaya dzekugamuchidzana masimba murunyararo uye hutongo hwejekerere.
Mutungamiri weAmerica, VaJoe Biden nemutevedzeri wavo, Amai Kamala Harris, vange vari mudare reparamende reUS Capitol muWashington DC vachishora zvikuru zvakaitika musi wa 6 Ndira Izvi. VaBiden vati zvakaitika zvakadzosera kumashure hutongo hwejechetere.
Amai Harris vatiwo zvakaitika musi uyu zvinoratidza kuti hutongo hwejekerere hunofanira kubatwa sezai sezvo huchigona kupwa sedova.
VaTrump vainge vambovimbisa kupawo divi ravo kumba kwavo kuMar-a-Lago, Florida, asi havana kuzoita izvi asi vachiri kungoramba havo kutambira zvakabuda musarudzo.
Dunhu rakanetsawo rairamba kutambirwa naVaTrump zvakabuda musarudzo dzaro ndere Pennsylvania uko kwakaberekerwa VaBiden.
Chizvarwa cheZimbabwe chinogara mudunhu iri, VaNicholas Mada, avo vanoona nezvekurongwa kwemisangano mubato reMDC Alliance muno muAmerica, vati vari kufara kuti zvaida kuitwa naVaTrump zvekuti sarudzo dzemudunhu iri dzisatambirwe, zvakakona n’anga murapwa achida.
Vachipawo pfungwa dzavo, mukuru mubazi rezvekuburitswa kwemashoko mubato reZanu-PF, VaTafadzwa Mugwadi, vanoti zvakaitika muAmerica zvinonyadzisa uye nyika iyi haifanire kuda kuzviita muzivi wezvose panyaya yehutongi hwejekerere.
Asi vachipawo pfungwa dzavo, gweta rinorwira kodzero dzevanhu vari mukuru wesangano reZImrights, VaDzikamai Bere, vanoti zvakaitika muAmerica zvakaratidzawo chimwe chinhu chikuru chekuti mutungamiri wenyika haasi pamusoro pemutemo.
Vanhu vatanhatu kusanganisira mumwe mupurisa vakafa nezvikonzero zvakasiyana siyana mumhirizhonga iyi.
Vamwe vanhu vanosvika mazana manomwe vakaendeswa kumatare mushure mekunge vabatwa nematikitivha eFBI ayo ari kuferefeta nyaya iyi.
Muchuchusi mukuru wehurumende yeAmerica, VaMerrick Garland, vanoti vari kuzoita zvose zvavanokwanisa kuti vose vane chekuita nemhirizhonga iyi vamiswa pamberi pematare edzimhosva.
Dare reHouse of Representatives rakaumbawo komiti ine nhengo kubva kumapato ose ari mudare iri kuti iferefetewo zvakaitika kusanganisira zvakaitwa naVaTrump pamwe nezvavasina kuita zvavaitarisirwa kuita semutungamiri wenyika panguva iyi.
Vane ruzivo nezvenhoroondo yeAmerica vanoti mhirizhonga yakaitwa nevatsigiri vaVaTrump yakapedzisira kuonekwa makore mazana maviri nemasere adarika apo musi wa 24 Chikumi 1814 munguva yehondo pakati peBritain neAmerica, mauto eBritain akapinda muWashington DC ndokupisa dare reUS Capitol uye muzinda wemutungamiri wenyika nezvimwe zvivakwa.
Chando neCovid-19 Zvokonzera Kukanzurwa kweZviuru neZviuru zveNzendo dzeNdege
Kusvika masikati ane zuro, Svondo, nzendo dzaifanirwa kuitwa nendege dzinoita zviuru zviviri nemazana matatu (2,300) dzakanga dzakanzurwa nepamusana pechando chakawandisa, kutonhora uye nedenda reCovid-19.
Nemusi weMugovera, nzendo dzengege dzinoita zviuru zviviri nemazana manomwe (2,700) dzakakanzurwa muAmerica uye nzendo dzinoita zviuru zvina nemazana manomwe (4,700) dzakakanzurwa pasi pose.
Matunhu mazhinji ari pakati peAmerica akatarisana nechando chakaipisisa chiri kutadzisa mabasa mazhinji kuti aitwe, kusanganisira kufamba kwendege. Izvi zvakakonzera kuti zviuru nezviuru zvendege dzisabvumidzwa kubhururuka.
Ukuvo denda reCovid-19 rakavhiringa vashandi vazhinji vanoshanda mundege zvokuti vashandirwi vakatanga kukurudzira vashandi kuti vashande maawa mazhinji kusvika mwedzi unouya vachitambiriswa mari yakapetwa katatu pane yavanositambira.
Vanodzidzisa zvemabhizimisi paDevry University, Muzvinafundo Elliot Masocha, vanoti kunaya kwechando nekupararira kwedenda reCovid-19 hazvisi kukanganisa mafambiro evanhu chete asi kuti zviri kukanganisa zvemabhizimisi nezvehupfumi hwenyika izvo zvichiri kuremerwa nekubuda mudambudziko rekumbovhara kwemwedzi mizhinji, zvakakonzerawo kuvharwa kwemabhizimisi mazhinji.
VaJoe Biden Vanoti Varwadziwa Zvikuru neRufu rwa Archbishop Desmond Tutu
Mutungamiri weAmerica, VaJoe Biden, nemudzimai wavo, Amai Jill Biden, vanoti varwadziwa zvikuru kunzwa nezvekufa kwaArchbishop Desmond Tutu, vachiti mufi ange akazvipira mukunamata uye aine chido chekuti kodzero dzevanhu dziremekedzwe.
VaBiden vati vakaropafadzwa zvikuru mukuwana nguva yekuzivana naVaTutu kwemakore akawanda, vachiti kuzvipira kwavo nehushingi hwavo mukurwira kodzero dzevanhu kwakakurudzira America kuti ivandudze maonero ayaiita hurumende yerusaruraganda, kana kuti Apartheid, muSouth Africa.
Archibishop Tutu vakashaya nemusi weSvondo vava nemakore makumi mapfumbamwe.
Baba naAmai Biden vati vakafara zvikuru pakushanyira VaTutu panguva yeWorld Cup yegore ra2010, vachitizve mwedzi mishoma yapfuura, vakabatana nedzimwe nyika mukupemberera kusvitsa kwaVaTutu makore makumi mapfumbamwe.
Munyori mukuru musangano remakereke, reZimbabwe Council of Churches, Reverend Doctor Kenneth Mtata, vanoti vafundisi vazhinji vanokurudzirwa nemabasa aVaTutu zvekuti vazhinji mukati mavo vari kushanda nesimba vachitevedzera mabasa aVaTutu.
- Marvellous Mhlanga-Nyahuye
Chizvarwa cheZimbabwe Chobatsira Vanoda Kudzidza muAmerica
Chimwe chizvarwa cheZimbabwe chiri muAmerica Amai Alletha Mujeyi-Muzorewa chiri kukuridzira vabereki kuti vasatyire kure kutsvaga nzira dzekuti vakwanise kutumira vana vavo kuzvikoro zvepamusoro zvemu America.
Vanoti kune mari dzekubatsira kana kuti mascholaships akawanda avanokwanisa kuwana kuti vaite zvidzidzo zvavo. Vaenderera mberi vachiti vamwe vanokwanisa kudzidza vari muZimbabwe asi vachishandisa dandemutande kuita zvidzidzo zvavo.
Amai Mujeyi Muzorewa vanoti vari kushanda zvakare nevamwe vekune dzimwe nyika dzemuAfrica kusanganisira vachivapa dzidziso yekuti vangawane sei mari dzedzidzo pazvirongwa zvavanoita pamadandemutande akaita seZoom, paFacebook neWhatsApp.
"Shuwiro yangu ndeyekuti veruzhinji munyika vazive nzira dzakasiyana siyana dzekuwana dzidzo mungave muAmerica kana kuzvikoro zviri muAmerica vachisandisa dandemutande," Amai Mujeyi Muzorewa vaudza Studio7.
VaBiden Voparura Nhasi Musangano weHutongo Hwejekerere Pasi Rose
Musangano wehutongo hwejekerere wakakokerwa nemutungamiri weAmerica, VaJoe Biden, unotanga nhasi, China, padandemutande nenguva dz 3 masikati (3pm).
Musangano uyu unonzi uchaitwa kubva musi weChina 9 Zvita kusvika musi wa 10 Zvita uye uchange uchitarisa zvinokanganisa hutongo wejekerere, uchipawo mukana kuvatungamiri vedzimwe nyika kuti vabude pachena vachitaridza kuzvipira kwavo mukusimudzira hutongi hwejekerere.
Musangano uyu unobva pachido chaVaBiden chekukurudzira nyika dzepasi pose kuti dzisimbise hutongi hwejekerere, uho vamwe vanoti hwakadzikira pasi rose kusanganisira muAmerica zvichitevera hutongi hwevaimbova mutungamiri weAmerica, VaDonald Trump.
Bazi reAmerica rinoona nezvekudyidzana nedzimwe nyika, reState Department, rinoti ongororo yarakaita inoratidza kuti zvinhu zvikuru zvinodiwa zvinosanganisa kudzivirira hutongi hwehumbimbindoga, kurwisa huori nekukurudzira kuremekedzwa kwekodzero dzevanhu.
Zimbabwe haina kukokwa kumusangano uyu asi dzimwe nyika dzemuAfrica dzakakokwa kumusangano uyu dzinosanganisa Angola, Botswana, DR Congo, Ghana, Kenya, Liberia, Malawi, Namibia, South Africa neZambia.
Nyanzvi mune zvematongerwo enyika, vachidzidzisa paWellesley College, mudunhu reMassachusetts, Muzvinafundo Chipo Dendere, vaudza Studio 7 kuti musanagano uyu ndewekutanga uye uchange uchitora nzvimbo muna Ndira gore roga roga.
Vanoti iyi inzira yaVaBiden yekukurudzira nekubatsira nyika dziri kuedza kutevera gwara rehutongi hwejekere pasi pose.
Facebook Forum