Mutongi wedare repamusoro re High Court, Va Muchineripi Bhunu, nhasi varamba kutambira chikumbiro chakaitwa nemagweta emubati wehomwe mu MDC, Va Roy Bennett, chekuti Va Peter Hitschmann vasabvumidzwe nedare kupa humbowo hwavo munyaya iri kupomerwa Va Bennett.
Va Bhunu varamba zvakare kutambira chikumbiro chemu chuchusi mukuru wehurumende, Va Johannes Tomana, chekuti humbowo humwe hwakaiswa mudare nemagweta aVa Bennett husatambirwe nedare.
Va Bhunu vati Va Hitschmann vanosungirwa kuuya kuzopa humbowo mudare sekutarwa kwazvakaitwa nevachuchisi.
Humbowo hwavo ndihwo huri kutarisirwa kusungirira Va Bennett avo vari kupomerwa mhosva yekuda kubvisa hurumende nechisimba.
VaBhunu vati ivo ndivo vachazoona pakupera kwenyaya kuti humbowo hwapihwa mudare hune hudzamu here kana kuti kwete.
Va Trust Maanda vanoti havasi kufara nemutongo wanhasi kasi hapana chavanokwanisa kuita kasi kurwisa kuti VaBennett vasaende kujeri.
Muchuchisi mukuru wehurumende Va Johannes Tomana vanoti vanoti kunyangwe mutongi akanda nyaya yavo panze, vachenderera mberi nekuruka nyaya yavo yavari kupomera vaBennett.
Dzimwe Nhau Kubva KuStudio7...
