Sangano rinomirira vashandi vehurumende, rePublic Service Association (PSA) rinoti kana vashandi vakasawirirana nehurumende panyaya dzemihoro yavari kuda, vacharamwa mabasa.
Vashandi vehurumende vari kuda kuti vatambire mari dzinobvira pa US$402.00 pamwedzi, uye pamusoro pemari iyi, vanoda zvakare US$100.00 yekubatsirika pakufamba nepekugara.
Pamusangano wakaitwa svondo rapera pakati pevashandi nevashandirwi, zvinonzi vaimirira hurumende vakakumbira mazuva gumi nemana ekuti vazeye nevakuru vavo vasati vazivisa matanho avachatora.
Hurumende iri
kuchema chemawo kuti haina mari. Pari zvino mushandi wepasi ari kutambira zana
remadhora eku America pamwedzi. Studio7 haina kukwanisa kutaura negurukota revashandi vehurumende, VaEliphas Mukonoweshuro, kuti tinzwe pamire hurumende panyaya iyi.
Munyori wePublic Service Association, VaEmmanuel Tichareva, vanoti vari kutarisira kusangana zvakare nehurumende panopera mazuva gumi nemana kuti vanzwe zvavachapiwa.