Accessibility links

Breaking News

UZ Inotadza Kuvhurwa Sezvo Isina Mari


University of Zimbabwe yakakundikana kuvhura neMuvhuro sezvanga zvakatarisirwa pasina zvikonzero zvakaziviswa pamusoro pedanho iri. Zvinonzi vakuru vechikoro ichi vakangonamira zviziviso zvekuti chikoro hachisati chava kuvhurwa.

Asi vane ruzivo nezviri kuitika vanoti pane dambudziko rekushaikwa kwemari inodiwa kuti chikoro ichi chishande, uye kushaikwa kwemari dzekutambirisa vadzidzisi.

Vadzidzi vanonzi vari kunyunyutawo nemari dzavakanzi vabhadhare patemu yoga-yoga, idzo dziri pakati peUS$420.00 neUS$600.00.

Gurukota rezvedzidzo yepamusoro soro, Doctor Stan Mudenge, vanonziwo havana zvizhinji zvavari kuita mukugadzirisa dambudziko rakatarisana nechikoro ichi.

Vadzidzisi vanonzi havasati vatambiriswa mavhocha avo eUS$100.00, yekuti vabatsirikane.

Tatadza kubata vebazi rezvedzidzo yepamusoro kanawo veUniversity of Zimbabwe kuti tinzwewo divi ravo.

Mutungamiri weZimbabwe State Universities Union of Academics, uye vari mutungamiri wevadzidzisi vepaUniversity of Zimbabwe, VaGovernment Phiri, vaudza Jonga Kandemiiri weStudio7 kuti vadzidzisi vakapedzisira kutambira mari muna Chikumi wegore rapera.

Mutauriri wesangano revadzidzi vemuzvikoro zvepamusoro reZINASU, VaBlessing Vava, vanotiwo vadzidzi vakakatyamadzwa nedanho rakatorwa nevakuru vechikoro ichi rekuti chirambe chakavharwa.


Dzimwe Nhau Kubva kuStudio7...

XS
SM
MD
LG