Mutungamiri wenyika, VaRobert
Mugabe, vagadza zvakare gavhuna webhanga guru renyika, VaGideon Gono, kuti
varambe vari mukuru webhanga iri kwemakore mashanu anotevera. Izvi zvinoreva
kuti VaGono vachange vari gavhuna webhanga iri kusvika mugore ra2013.
Nguva yaVaGono yekutungamira RBZ yanga ichipera
kupera kwaMbudzi. VaGono vakagadzwa sagavhuna we RBZ mugore ra2003, pasi
pemutemo weReserve Bank Act. VaMugabe vakagadza VaGono vachitarisira kuti vanga
gadzirise nyaya dzeupfumi munyika, asi izvi hazvina kubudirira, sezvo hupfumi
hwatonyaya kuparara.
VaGono, avo vaiona nezve kuchengetwa kwemari
dzaVaMugabe nemudzimai wavo Grace pavaive mukuru webhanga reCBZ, vari kushorwa
nenyanzvi munyaya dzehupfumi vachinzi vari kutadza kugadzirisa nyaya dzemari
munyika.
Mutauriri weMDC, VaNelson Chamisa, vaudza Jonga
Kandemiiri weStudio 7 kuti vane matanho ava chatorawo sebato kuratidza
kusatambira kwavo zvaitwa naVaMugabe izvi.
Zvichakadaro, dzimwe nyanzvi munyaya dzezveupfumi dzinoti VaGono
ndivo mumwe wevanhu vakaita kuti upfumi hwenyika huparare kusvika pahwave
nekuramba vachidhinda mari, pamwe nejutyora mitemo ine chekuita nekufambiswa kwemari munyika.
VaProsper Chitambara inyanzvi munyaya
dzezveupfumi uye vari kuita zvidzidzo zvepamusoro munyaya dzemari paBirmingham
University kuBritain.
VaChitambara vanotiwo danho ratorwa naVaMugabe rinobatsira Zanu PF kwenguva pfupi, asi richikanganisa upfumi hwenyika mumakore anotevera.
Dzimwe Nhau Kubva kuStudio7...