Accessibility links

Breaking News

SADC Inokumbira VaMbeki Kuti Varambe Vari Mutongi Gava paNyaya yeZimbabwe


Sangano reSADC rakumbira hurumende yeSouth Africa kuti mutongi gava panyaya yeZimbabwe, VaThabo Mbeki, avo vaimbova mutungamiri wenyika iyi, vaenderere mberi nebasa kunyange hazvo vakabviswa pachigaro neANC.

Executive Secretary veSADC, VaTomaz Salamao, vaudza Studio7 kuti vakataura parunhare neChitatu nemutungamiri mutsva weSouth Africa, VaKgalema Motlanthe, vakavakumbira kuti vabvumidze VaMbeki kuti vaenderere mberi nebasa ravakatanga.

Mutauriri waVaMbeki, VaMukone Ratshitanga, vaudza Studio7 kuti VaMbeki vachiri kuzeya nyaya iyi, uye vachataura mumazuva mashoma kuti vakamira papi panyaya yekuramba vari mutongi gava.

VaSalamao vaudzawo Studio 7 kuti vakatambira chikumbiro cheMDC kuti VaMbeki vapindire sezvo paita makakatanwa panyaya yedare remakurukota. Izvi zvinotevera kusawirirana kwakaitika pakati paVaMugabe naVaTsvangirai neChipiri panyaya yekugovana mapazi ehurumende.

Vamwe vakuru veSADC vaudzawo Studio 7 kuti vange vachida kuti kana zvichibvira, VaMbeki vaende kuZimbabwe neChina kunogadzirisa gakava ravapo.

Asi gurukota rezvemitemo, VaPatrick Chinamasa, vanoti hapana mangange aripo, uye havaoni zvakakodzera kuti nhaurirano idzi dzidzoserwe kuna VaMbeki.

Asi MDC inoti pane kusawirirana kuripo pakati paVaTsvangirai naVaMugabe, uye yakwidza nyaya iyi kuSADC, pamwe neAfrican Union.

Mutauriri weMDC, VaNelson Chamisa, vaudza mutori wenhau Blessing Zulu weStudio 7 kuti bato ravo riri kuda kuti vekunze vayananise.

VaJoy Mabhenge vanoshanda nesangano reInstitute for a Democratic Alternative for Zimbabwe. VaMabhenge vanoti mutoro weZimbabwe ucharemera VaMbeki sezvo vasisina chiremera semutungamiri wenyika.

Nyanzvi munyaya dzezvehupfumi, VaLuxon Zembe, vanotiwo dambudziko rezvematongerwo enyika rikasagadziriswa, zvinogona kukonzera mhirizhonga munyika.

Dzimwe Nhau Kubva kuStudio7...

XS
SM
MD
LG