Vanorarama nehutachiwana hweHIV/AIDS
vanoti vari kushushikana nekuti hapana hurongwa hutsva huripo, hwekuvabatsira.
Muchibvumirano chakaitwa pakati peZANU-PF nemapato maviri EMDC, mutungamiri
werimwe bato re MDC, VaMorgan Tsvangirai, vakati zvakakosha kuti hurumende
igadzirise nyaya dzezvehutano nechimbichimbi.
Vanoongorora nyaya dzezvehutano vanoti vanhu vazhinji vari
kufa nedenda iri, sezvo vari kushaiwa mishonga, zvekudya, nevanorapa, avo vave
kungogara vakakanda mapadza pasi vachiti vanoda kuti mari dzavanotambira
dziwedzerwe.
Sangano reZimbabwe National Network of People Living with AIDS,
rinoti nhengo dzaro dzinodarika zana nemakumi maviri ezviuru dziri kuyaura
nenzara uye vari kuedza kuzeya nevebhanga guru kuti vakwanise kutengeserwawo
zvekudya pasi pechirongwa cheBACOSI, sezvo RBZ ichikoshesa kudya kudarika
mishonga.
Mutori wenhau dzeStudio7, Carole Gombakomba, aita hurukuro naVa Benjamin Mazhindu, sachigaro veZNPP+ avo vanoti vari kuedza kuita hurukuro nehurumende kuti vajekese kuti hazvina zvazvinobatsira kupa vanhu mishonga, iwo matumbu asina chinhu izvo zvisingabatsiri vanorarama neHIV/AIDS.