Accessibility links

Breaking News

Africa Union Yokurudzira Hurumende yeMubatanidzwa muZimbabwe


Musangano weAfrican Union, wapera Chipiri manheru kuSham el-Sheik kuEgypt, uko vatungamiri venyika dzemuAfrica, vakurudzira kuti Zimbabwe ive nehurumende yemubatanidzwa. Kurudziro iyi inotevera gakava riri munyika pakati pemutungamiri weMDC, VaMorgan Tsvangirai, pamwe nemutungamiri weZanu PF, VaRobert Mugabe. Vatungamiri venyika dzemuAfrica vanonzi vanetsekana kuti vabude nechisungo panyaya yezviri kuitika muZimbabwe. Vamwe vatungamiri vanonzi vanga vachitorumbidza VaMugabe, asi nyika shoma dzinosanganisira Liberia, Senegal, Sierra Leonne neGhana, ndidzo dzanga dzichida kuti VaMugabe vaomeserwe neAU.

VaMugabe vakaenda kumusangano uyu mushure mekusarudzwa kwavakaitwa neChishanu semutungamiri wenyika, musarudzo yavakapinda pasina anovakwikwidza, sezvo VaTsvangirai vakabuda musarudzo iyi. VaTsvangirai vakati havangapinde musarudzo iyi vatsigiri vavo vachipondwa nevatsigiri vaVaMugabe.

Asi mutauriri waVaMugabe, VaGeorge Charamba, vaudza vatori venahu kuEgypt kuti hurumende yavo haisi kuzoumba hurumende yemubatanidzwa neMDC.

Ukuwo mutungamiri weBotswana, Va Ian Khama Seretse Khama, vanonzi vakurudzira vamwe vatungamiri venyika dzemuAfrica kuti vadzinge VaMugabe musangano reAU, zvichitevera mabatiro avakaita sarudzo ye run-off, pamwe nenyaya yekushungurudzwa kuri kuitwa vanopikisa hurumende yeZANU-PF.


Vatungamiri ava vakaparurawo gwaro reMillenium Development Goals in Africa, iro rakatarisirwa kupa vatungamiri vemuAfrica gwara rekuti vatsvage nzira dzekupedza matambudziko emuAfrica.

Mutevedzeri wemunyori weUnited Nations, Mai Asha Rose Migiro, sachigaro veAU, uye vari mutungamiri weTanzania, VaJakaya Kikwete, pamwe nasachigaro ve AU Commission, VaJean Ping, ndivo vaparura gwaro iri, iro richange richizoshandiswa kumusangano wevatungamiri venyika sere dzakabudirira, kana kuti G8 Summit, uyo wakatarisirwa kutanga muJapan svondo rinouya.

Mutori wenhau dzeStudio 7, Carole Gombakomba, aita hurukuro naProfessor John Makumbe, nyanzvi munyaya dzezve matongerwo enyika, avo vanoti danho ratorwa neAU rwendo runo, ratomboratidza kuti vari kushushikana nezviri kuitika muZimbabwe.


Dzimwe Nhau Kubva ku Studio 7...

XS
SM
MD
LG