Mutungamiri weSouth Africa, VaThabo Mbeki, vave kubvuma kekutanga kuti muZimbabwe mune mhirizhonga isina kunaka.
VaMbeki vati mhirizhonga iri kuitika muZimbabwe yasvika pakaipisisa zvekuti inofanira kuti imiswe nechimbi chimbi, sarudzo yemutungamiri wenyika isati yaitwa. VaMbeki vakataura mashoko aya neChitatu mudare ravo reparamende.
Kunyange hazvo VaMbeki vange vachitaura nezvemhirizhonga iyi, Zanu-PF yange ichiitawo hurongwa hwekuendesa vaimbova varwiri verusununguko kuMasvingo nedzimwe nzvimbo dzose dzayakakundwa neMDC. Sachigaro weZimbabwe War Veterans Association, VaJabulani Sibanda, vanoti vachataura nezvenyaya iyi munguva pfupi inotevera.
KuMasvingo kwaparurwawo chirongwa chinonzi “Operation Buruka Mugomo Tisangane muVillage”, icho chiri kutungamirwa nemauto nevaimbova varwiri verusunguko.
Chirongwa ichi ndechekunotsvaga nekuponda vatsigiri veMDC vakapotera mumakomo. Nyaya yemhirizhonga iyi yapawo America neUnited Nations kuti dziumbe homwe yemari yekupa vose vari kuenda kunoongorora sarudzo dzemuZimbabwe.
VaTapera Kapuya ndivo Cordinator weNCA kuSouth Africa.
VaKapuya vaudza mutori wenhau Blessing Zulu weStudio 7 kuti VaMbeki vakatodya manonoko panyaya yekushora mhirizhonga yaVaMugabe.