Nhengo dzebato reMDC inotungamirirwa naVaMorgan Tsvangirai muBindura, dzabuda mumusangano wezvemapato ezvematongerwo enyika wanga wadaidzirwa neZEC, mushure mekunge sangano iri raudza nhengo idzi kuti dzibvise zvipfeko zvebato razvo .
Nhengo idzi dzinoti patanga musangano vose vemapato ezvematongerwo enyika vanga vari mumusangano uyu kusanganisirawo veZanu PF, vanga vakapfeka zvipfeko zvemapato avo, asi vashandi veZEC vanonzi vati veMDC vabvise zvipfeko zvavo, izvo zvisina kutambirwa zvakanaka nevebato iri.
Hatina kukwanisa kunzwa divi reZEC panyaya iyi.
Asi VaSaymore Mhene, sachigaro weMDC muWard 8 muBindura vaudza Jonga Kandemiiri weStudio 7 kuti vakwidzawo nyaya yavo iyi kuvakuru veZEC.
Zvichakadaro, VaMhene vaudza Studio 7 kuti nhengo dzebato ravo dzadzingwa parufu rweimwe nhengo yavo yakashaya neChipiri, mushure mekunge nhengo dzeZanu PF dzasvika parufu apa.
VaMhene vati vebato reZanu PF ava vazodaidza mapurisa mushure mekunge varamba kubva parufu apa.