Dare ramagistrate, neChishanu rarasa chikumbiro chekuti nhengo dze MDC dziri muhusungwa, dzibuditswe mu remand kusvika musi wa 29 mwedzi uno, apo nyaya iyi ichazonzwika zvakare nedare iri.
Rimwe remagweta ari kumirira vasungwa ava, Va Alec Muchadehama, vaudza Studio 7 kuti vatarisira kukwidza nyaya iyi kudare re High Court nemusi weChipiri, apo vachaendesa chikumbiro chekuti vasungwa ava, vapihwe mukana wekubvisiswa mari yechibatiso, kuitira nyaya yavo itongwe vachibva kudzimba dzavo.
VaMuchadehama, vaudza mutori wenhau we Studio 7, Carole Gombakomba kuti ivo nenhengo dze MDC dziri muhusungwa, dzinosanganisira mumiriri weGlen View muparamende, Va Paul Madzore , havana kufadzwa nemutongo wapihwa nedare.
Dzimwe nhengo dzeMDC ina dzinosanganisira Va Morgan Komichi, Va Dennis Mhurira, Va Raymond Bhake naVa George Sundare , vakatarisirwa kumira pamberi pedare nemusi weMuvhuro
Nepamusana pekuti nyaya iyi yaramba yonetsa mumatare, ichiti ikamboendeswa ku High Court, yodzoserwazve kumagistrate court, nyanzvi munyaya dzezve matongerwo enyika dzinoti hadzisi kufadzwa nemafambiro ari kuita nyaya iyi.
Doctor John Makumbe inyanzvi munyaya dzezve matongerwo enyika, uye vari mudzidzisi pa University of Zimbabwe, Carole Gombakomba aita zvakare hurukuro naVaMakumbe kuti tinzwe pfungwa dzavo panyaya iyi.