Bhanga guru renyika reReserve Bank of Zimbabwe riri kutarisirwa svondo rino kuparura imwe mari itsva inonzi “structured currency” kuyedza kudzikamisa dhora remunyika rave kutatarika zvakanyanya zvichienzaniswa nedhora rekuAmerica.
Svondo rapera, dhora rekuAmerica range rave kutombotengwa nemadhora emunyika zviuru makumi mana nemashanu risati radzika kusvika pazviuru makumi matatu nemashanu nekuda kwezororo reEaster. Kushaya simba kwedhora remunyika kwapawo kuti mitengo yezvinhu iite chamurambamhuru.
Vaive gavhun
a weRBZ VaJohn Mangudya nevakatora basa ravo VaJohn Mushayavanhu vari kutarisirwa kubatsirana kuparura gwaro remafambiro emari nemari itsva iyi.
Chipangamazano cheReserve Bank of Zimbabwe VaPersistence Gwanyanya vaudza Studio 7 kuti vane chivimbo chekuti mari itsva iyi ichashanda zvakanaka.
Asi imwe nyanzvi munyaya dzezvehupfumi VaEddie Mahembe vanoshanda nekambani yeUnderhill Corporate Solutions vanoti havaona mari iyi ichishanda sezvo zviri kuitwa zvakamboyedza zvikakona n’anga murapwa achida.
Forum