Israel nhasi yaenderera mberi nekurwisa dunhu reGaza ichipika kuti haisi kuzomisa hondo sezviri kukurudzirwa neUnited Nations.
Sangano reUnited Nations Security Council nezuro rakavhota kuti kurwisana pakati peIsrael nechikwata cheHamas kumbomira panguva ino yemwedzi weRamadan wakakosha muchitendero chemaMuslims.
Asi Israel haisi kufara nedanho iri ichiti inoda kuti zvizvarwa zvayo zvakatapwa neHamas zvitange zvabuditswa muhusungwa.
America, iyo inombotsigira Israel muSecurity Council, rwendo rwuno haina kuvhota zvakapa kuti chisungo ichi chitambirwe nedzimwe nyika gumi neina dziri mukanzuru iyi.
Chisungo ichi chaunza kunetsana pakati peIsrael neAmerica zvakapa kuti Israel iti vakuru muhurumende yenyika iyi vaifanira kuenda kuWashington vagurire rwendo rwavo panzira.
Mutungamiri wenyika yeAmerica, VaJoe Biden, vava nenguva vachikurudzira mutungamiri wehurumende yeIsrael, VaBenjamin Netanyahu, kuti vasarwise dunhu reRafa iro rakapotera zvizvarwa zvePalestine zvakawanda.
Asi VaNetanyahu vari kutsika madziro vachiti varikuzorirwisa sezvo vari kuda kuparadza chikwata cheHamas. VaBiden naVaNetanyahu vari kunetsana panyaya yekuti Israel iri kupomerwa mhosva yekuvharidzira kuti vanhu vemuPalestine vapihwe zvekudya nemishonga. Israel iri kuramba kuti iri kuita izvi.
Vanoongorora zvematongerwo enyika, Doctor Frenk Guni, vanoti VaNetanyahu vagara vakaomesa musoro, vachiramba mazano mazhinji avanopiwa neAmerica kunyangwe hazvo nyika yavo ichipihwa mari nezvombo neAmerica.
Forum