Makundano enhabvu yepamusoro eCastle Lager Premier Soccer League emwaka uno asimuka nhasi Ngezi Platinum Stars, iyo ine mukombe uyu, ichikundikana kutora mapoinzi ose.
Makundano aya asimuka musi uyo chikwata chine mukombe uyu cheNgezi Platinum Stars chichiita mangange 0-0 neArenel Movers, iyo ichangopinda muPSL.
Veruzhinji vanga vachitarisira kuti Ngezi ichaitirwa nyore nemutambo uyu yokunda, asi Arenel yaratidza kuti hakusisina zvikwata zvinonzi zvidiki.
Mitambo yatanga zvinodakadza asi vamwe havana kufara, nezvabuda mumitambo iyi.
Chikwata cheCaps United charohwa 1 kwa zero neChicken Inn, kuchitiwo
ZPC Kariba ichiita mangange 2-2 nechimwe chikwata chitsva che TelOne, kuchitiwo Greenfuel ichirova Bulawayo Chiefs 2 – 1.
Makundano aya ari kusimuka paine manyuku-nyuku ayo awedzerwa nekudzoka munyika kwemutambi ane mukurumbira Khama Billiart, uyo anga achimbotamba ari kuSouth Africa mumakore gumi adarika.
Khama, uyo anga achidiwa nezvikwata zvinosanganisira Dynamos, Ngezi Platinum Stars neManica Diamonds, akazosarudza Yadah, iyo yakamukwezva nekumupa mari zhinji kudarika zvimwe zvikwata izvi.
Murairidzi wemutambo wenhabvu, Mugove Makanyire, anoti kudzoka kwaKhama naKuda Mahachi muPSL kunobatsira kusimudzira nhabvu yemunyika.
Yadah naBilliart vari kusimudzira makundano avo nemutambo wavo wekutanga neHwange mangwana muColliery, umo Chipangano isingawanzoroveka zvekutamba.
Kunyange zvakadaro, Yadah haisi pazvikwata zviri kutarisirwa kurwira zvine mutsindo kutora mukombe mukuru wenhabvu munyika uyu.
Zvimwe zvikwata zvanga zviri mubishiwo pamariketi kutenga vatambi vatsva zvichitungamirwa neSimba Bhora, iyo yakatenga vatambi gumi nevaviri, neCaps United, iyo yakaunganidza vatambi vatsva gumi.
Asi mukuru weCaps United, VaFarai Jere, vayambira vatambi vakatengwa nechikwata chavo kuti vanofanira kuziva kuti kutambira Caps United zvinorevei?
Asi nyaya iri pamiromo yevazhinji ndeyekuti achatora mukombe mukuru uyu ndiani?
Mumwe muongorori wemutambo wenhabvu, VaKelvin Mushonga, vanoti mitambo iri kuratidza kuti inenge yakabaka moto mwaka uno, asi pakugumisira vanoti Dynamos ndiyo ichatora mukombe.
Asi Dynamos ichange ichirwa hondo mbiri sezvo iri kukwikwidza zvekare mumakundano eCAF Confederation Cup mushure mekutora mukombe weChibuku Super Cup mwaka wapera.
Ngezi Platinum Stars, iyo inove ndiyo yakatora mukombe weligi, ichange yakamirirawo nyika asi muCAF Champions League.
Makanyire anofunga iye kuti Ngezi inogona kutora mukombe weligi zvekare, asi asingakanganwewo FC Platinum.
Mimwe mitambo iriko neSvondo yakamira seizvi, Highlanders vs Dynamos - Barbourfields; Manica Diamonds vs Simba Bhora - Sakubva.
Forum