Vaimbove mumiririri weZengeza West mudare reparamende, VaJob Sikhala, vabatwa vaine mhosva yekunzi vakataura manyepo. Asi magweta anorwira kodzero dzevanhu anoti mutemo washandiswa kuvabata nemhosva hausi mubumbiro remitemo.
Mutongi wedare Amai Feresi Chakanyuka vati dare rawana VaSikhala vaine mhosva yekutaura manyepo padandemutande ravo reFacebook muna Ndira wa2021 vachiti pane mwana aive ashaya mushure mekurohwa netsvimbo yemapurisa muHarare. Asi mapurisa akazobuda achiti mwana uyu ainge asina kufa.
Asi mumwe akambotbatwa nenyaya iyi mutori wenhau Hopewell Chin’ono akanzi nedare repamusoro reHigh Court asungunurwe sezvo muna 2014, dare repamusoro soro munyaya yaipomerwa vatori venhau veZimbabwe Independent vanoti Constantine Chimakure, Vincent Kahiya namushakabvu Iden Witherel rakati chikamu chechimakumi matatu nerimwe kana kuti section 31 yeCriminal Law (Codification and Reform) Act waityora kodzero dziri mubumbiro remitemo.
Rimwe gweta raVaSikhala VaJeremiah Bamu vatenda kuti vakambosimudza nyaya iyi mudare.
Amai Chakanyuka nevachuchusi vakaramba kutambira kurudziro yekuti nyaya iyi iraswe vachiti mutemo uyu wainge wawandudzwa asi pasina kupa humbowo hwekuti izvi zvainge zvaitwa sei.
Mutongi ati mashoko aVaSikhala aipa kuti mapurisa ashorwe zvakanyanya nevazhinji. Vatiwo kunyangwe dare ranga risina kupiwa humbowo hwakakwana hwekuti VaSikhala ndivo vaive muridzi wedandemutande reFacebook iri, kuvapo kwechiso chavo humbowo hwakakwana.
VaBamu vati havagutsikane nemutongo wapihwa uyu.
VaBamu vatiwo vachadzoka kudare musi wa12 Kukadzi kuti vaise zvichemo zvavo pasati paturwa mutongo. VaSikhala vachapihwa chirango ichi vachibva kumba.
Mumwe mutsigiri weCitizens Coalition for Change VaJeff Chaitezvi vashora kubatwa nemhosva kwaitwa vaSikhala vachiti havagutsikani nemutongo wanhasi.
Asi gurukota rinoona nezvemitemo VaZiyambi Ziyambi vanoti hurumende haipindire mukutongwa kwenyaya.
Magweta aVaSikhala anoti achapikisa mutongo uyu kudare repamusoro reHigh court. Vaimbova mumiriri weMount Pleasant mudare reparamende Muzvare Fadzayi Mahere vakabatwa nemhosva imwe chete yabatwa nayo VaSikhala vakanzi vabhadhare madhora mazana mashanu ekuAmerica. Vari kupikisawo mutongo uyu.
Forum