Mutongi wedare repamusoro reHigh Court, Justice Tawanda Chitapi, nhasi vambosendeka parutivi mutongo wavo panyaya yakakwidzwa kudare iri nebato rinopikisa reCitizens’ Coalition for Change, CCC, yekuti VaSengezo Tshabangu, avo vari kuzviti ndivo vakafanobata chigaro chemunyori mukuru webato iri, havana masimba ekudzinga nhengo dzebato.
VaChitapi vati vachapa mutongo uyu panguva shoma inotevera, kunyangwe hazvo vasina kuzivisa musi mushure mekunge gweta reCCC, VaObey Shava nevanga vachitungamirira magweta aVaTshabangu, VaLewis Uriri, vapa zvichemo zvavo kudare panyaya iyi.
VaShava vabvuma kuti izvi ndozvaitika mudare. Vati,”Taenda mudare tichiti mutongi tibatsireiwo taita nhau yemurume anonzi Tshabangu angoerekana anyuka sehohwa tisingazive kwaanobva nako nekwaari kuenda asi hunhu hwake arikudzinga nhengo dzeparamende nemakanzuru dzeCCC zvinova kunze kwemutemo. Saka tati dare tibatsireiwo musunge maoko emurume uyu asaramba achidzinga vanhu. Saka dare rati roda kumboverenga zvataurwa nekuita tsvagurudzo ndozokupai mutongo. .”
Mudare, VaShava vati gwaro rebumbiro remitemo rakaunzwa kudare richinzi ndereCCC riri kubudisa pachena kuti pane dzimwe nzvimbo mugwaro iri bato reCCC mariri kunzi naVaTshabangu ndiko kwavakafanobata chigaro chemunyori mukuru riri kunzi Movement for Democratic Change.
VaShava vaudza dare kuti hazvigoni kuti mapato maviri aya, anoti reCCC nereMDC, abatanidzwe, vachiti mapato maviri akatosiyana uye akakwikwidza musarudzo dzaNyamavhuvhu zvakasiyana. VaShava vaudza vatori venhau kuti kuCCC, VaTshabangu havazivikanwe.
VaSithole vati vamirira pachaturwa mutongo naVaChitapi.
Magweta anga akamiririra gurukota rezvekutongwa kwematunhu, VaWinston Chitando, pamwe nevatungamiriri vematare eSenate neNational Assembly audza dare kuti achangoteverera nyaya iyi uye achagutsikana nezvinenge zvapiwa nedare.
VaTshabangu vakatanga kudzinga nhengo dzedare reNational Assembly, Senate nemakanzuru muna Gumiguru.
Nhengo makumi mana nembiri dzematare eNational Assembly ne Senate dzadzingwa naVaTshabangu kusvika pari zvino, uye makanzura makumi masere nematanhatu munyika yese adzingwawo kusvika pari zvino.
Asi dare reHigh Court kubva Chipiri chapfuura rakambomisa kwenguva shoma VaTshabangu kudzinga vanhu kusvika nyaya iri mumatare iyi yapera kutongwa.
Forum