Magweta anorwira kodzero dzevanhu eZimbabwe Lawyers for Human Rights akanyora tsamba kune mukuru vemajeri veZimbabwe Prisons and Correctional Service Commissioner-General Moses Chihobvu vachida kunzwisisa kuti sei vakaburitsa muhusungwa VaBobby Makaza vane makore makumi mashanu nemapfumbamwe mujeri reHarare Central Prison musi wa 19 Chivabvu.
Magweta eZLHR VaTinashe Chinopfukutwa naVaPaidamoyo Saurombe ndivo vari kumirira mwana uyu. VaSaurombe vati vave kuronga kutora matanho ekuenda kumatare sezvo VaChihobvu vasina kupindira tsamba yavo nemusi weChishanu pavange vavatarira zuva yekuti vajekese zvakaitika.
Mwana ane makore gumi nemashanu akabatwa chibharo naVaMakaza ndiye akaenda kumagweta eZLHR achida kunzwisisa kuti sei VaMakaza vakaburitswa mutirongo.
VaMakaza vekwaMurehwa vakaburitswa pakaregererwa vasungwa nemutungamiri wenyika VaEmmerson Mnangagwa.
Asi ZLHR iri rinoti VaMakaza nevamwe vakabatwa nemhosva dzekubata chibharo havaisafanira kuve vari pavasungwa vanokwanisa kuregererwa pachirongwa chemutungamiri wenyika ichi.
Rimwe remagweta riri kumirira mwana uyu VaPaidamoyo Saurombe vanoti vachange vachiwona kuti voenderera seyi nenyaya iyi sezvo vasati vanzwa kubva kusangano re Zimbabwe Prisons and Correctional Services.
“Tiri kutarisira kuti nyaya iyi irambe ichizeyewa saka tichawona kuti toita seyi pachapera vhiki sezvo tisina kunzwa kubva kusangano re Zimbabwe Prisons and Correctional Services avo vange vachifanirwa kutinyorera pakupera kwesvondo rapera,” VaSaurombe vaudza Studio7.
Forum