Sangano rinomirira varairidzi vekumaruwa, reAmalgamated Rural Teachers Union of Zimbabwe, ARTUZ, rinoti riri kushushikana zvakanyanya nenyaya yekusungwa kwaAmai Cecilia Alexander, vachipomerwa mhosva yekusanshandisa zvakanaka mari dzePublic Service Medical Aid Society, PSMAS.
Amai Alexander, vanove mutungamiri wesangano rinomirira vashandi vehurumende, reZimbabwe Confederation of Public Sector Trade Unions (ZCPSTU), ndivo zvakare mutevedzeri wasachigaro webhodhi rePremier Services Medical Investment, PSMI, kambani inotungamira PSMAS.
Mutungamiri weARTUZ, VaObert Msaraure vanoti zvinoshamisa kuti Amai Alexander vari kunzi havana kushandisa mari zvakanaka ivo vaifanirwa kunge vachimirira zvido zvevashandi kuPSMAS, asi vakapedzisira vave kuzvipa mazimari ekushandisa ivo vavanomirira vachitambura.
Amai Alexander vakasungwa neChitatu pamwechete nasachigaro vePremier Services Medical Investment, Va Wellington Tutisa vachipomerwa mhosva yekusafambisa zvakanaka US$900 000.00 uye $14 million yemadhora emunyika yavakazvipa semari dzekubatsirika kumazororo, kana kuti holiday allowances.
Asi munyori anoona nezvekurongwa kwemabasa muZCPSTU, VaCharles Chinosengwa, vanoti havangapi zvavo ARTUZ mhosva vachiti sangano iri rakanyora tsamba yarakanyora pamusoro panyaya iyi risina ruzivo rwuzere rwechakakonzera kuti Amai Alexander vasungwe.
VaChinosengwa vanoti zviri pachena kuti Amai Alexander, avo vanomirira zvakare vashandi vehurumende munhaurirano dzeNational Joint Negotiating Council, kana kuti NJNC, vari kushungurudzirwa mabasa avo ekurwira vashandi.
Amai Alexander naVaTutisa vakamiswa pamberi pedare neChishanu, vakanzi nemutongi vagare mutirongo kusvika vadzoka zvakare kudare musi wa 02 Chivabvu, unove Muvhuro unouya.
Facebook Forum