Nyaya yegwaro rekuganhurwa kwematunhu, kana kuti delimitation report, yatsviriridza munyika vamwe vachiti mutungamiri wenyika VaEmmerson Mnangagwa vari kutyora bumbiro remitemo nekusasaina gwaro rekutarwa kwematunhu iri kuti richive pamutemo, kunyange hazvo mazuva gumi nemana akwana kubva zvavakaripiwa nasachigaro veZEC, Justice Priscilla Chigumba.
Kunyange hazvo justice Chigumba vakaudza vatori venhau kuti gwaro ravakasvitsa kumutungamiri wenyika iri ndiro rekupedzisira, kana kuti final report, vamwe muhurumende vanonzi vari kupa mashoko anopikisana navo, vachiti gwaro rakasvitswa kumutungamiri wenyika igwaro rakagadziriswa, kana kuti revised report.
Hatina kukwanisa kubata mutauriri weZEC, VaJasper Mangwana kana mukuru anoona nezvesarudzo muZEC, VaUtoile Silaigwana kuti tinzwe divi reZEC panyaya iyi sezvo nharembozha dzavo dzanga dzisiri kudairwa.
Nyanzvi mune zvemutemo vachidzidzisa zvemutemo uye vachitungamira bato reN-C-A, Muzvinafundo Lovemore Madhuku, vanoti kunze chete kwekunge ZEC nasachigaro vayo, Justice Chigumba, vazivisa nyika kuburikidza nezvinyorwa kuti vakasvitsa gwaro rekupedzisira here kana kuti rakagadzurudzwa kumutungamiri wenyika, VaMnangagwa vanenge vasina mutemo wakavatyora.
Asi Muzvinafundo Madhuku vanoti vana veZimbabwe vanokwanisa zvavo kuenda kumatare kuti amanikidze ZEC naJustice Chigumba kuzivisa nyika kuti vakapa VaMnangagwa gwaro ripi, uyewo ivo VaMnangagwa kuti vakapiwa gwaro ripi?
Panyaya yekuti Justice Chigumba vakazivisa kuti vasvitsa gwaro rekupedzisira kumutungamiri wenyika, Muzvinafundo Madhuku vanoti izvozvo hazvisi pamutemo nekuti vakaita zvekuudza vatori venhau vavakasanganawo navo kumuzinda weState House.
Facebook Forum