Chikwata chevemabhizimusi vekuBelarus pamwe nemamwe makurukota chiri munyika chinonzi nezuro Muvhuro chakanyorerana zvibvumirano zvekutengeserana zvinodarika zvishanu nevemabhizimusi akazvimirira vemunyika.
Izvi zvinonzi zvakaitika pamusangano wekudyidzana kwevemabhizimusi vemunyika nevekuBelarus, weZimbabwe-Belarus Business Forum, wakaitirwa muHarare, apo mutevedzeri wemutungamiri wenyika, VaConstantino Chiwenga vaive ivo munyaikani mukuru.
Vanamuzvinabhizimusi vekuBelarus vanodarika makumi matatu vanonzi vari munyika umo vari kuita misangano yakasiyanasiyana nevamwe vavo vemunyika vari mumapoka akasiyanasiyana ezvemabhizimusi.
Gurukota rezvemaindisitiri, Doctor Sekai Nzenza, vanoti chikwata ichi chakauya pamberi perwendo rwemutungamiri wenyika yeBelarus, VaAleksandr Lukashenko, avo vakapindawo munyika nezuro murwendo rwunonzi rwakanangana nekusimbisa hukama hwagara huri pakati penyika yavo neZimbabwe.
Doctor Nzenza vanoti pamusangano uyu, ivo vakasanganawo negurukota rezvemaindasitiri rekuBelarus, uye musangano uyu wakanga wakarongwa neZimbabwe Chamber of Commerce, Confederation of Zimbabwe Industries pamwe nevamwe vakuru vakuru vemabhizimusi.
Nyanzvi mune zvehupfumi nekudyidzana kwenyika dzepasi rose, Muzvinafundo Elliot Masocha, vanoti kunyange hazvo pari kunzi pari kutengeseranwa pakati peZimbabwe neBelarus, hazvivikanwe kuti zvii zviri kunyanyotengeseranwa uye kuti ndeipi nyika iri kunyanya kutengesera imwe.
Facebook Forum