Sangano rinomirira vamwe vashandi vehurumende, reZimbabwe Confederation of Public Sector Trade Unions, ranyorera gurukota rezvevashandi nemabasa, Muzvinafundo Paul Mavima, tsamba yekukurudzira kuti paitwe musangano weNational Joint Negotiating Council, NJNC, wechimbichimbi.
Munyori anoona nezvekurongwa kwemisangano muZimbabwe Confederation of Public Sector Trade Unions, VaCharles Chinosengwa vanoti sangano ravo rinoda kuti vazeye nyaya dzemihoro yevashandi vehurumende mugore rino ra2023.
VaChinosengwa vanoti sesangano, vanoona kuti musangano uyu watononoka zvakanyanya sezvo vashandi vaine tarisiro iri pamutemo yekuti mihoro yavo inenge yakamira sei mwedzi waNdira uno usati wapera kuitira kuti vazive marongero avangaita.
Sangano reZimbabwe Confederation of Public Sector Trade Unions rinoenderera mberi richiti musangano uyu wakakoshawo zvikuru kuitira kuunza kugadzikana mumabasa kuburikidza nekutarwa kwemihoro inoraramisa vashandi vehurumende.
Asi Muzvinafundo Mavima vaudza Studio 7 musangano weNational Joint Negotiating Council unotarisirwa kuitwa mukati memwedzi mitatu yekutanga kwegore rino sezvakawiriranwa pamusango wakapedzisira kuitwa pakati pevamiriri vevashandi nevamiriri vehurumende.
Muzvinafundo Mavima vanoti hurumende yagara ine chido chekugadzirisa mashandiro evashandi vayo, asi vachiti chisati chavepo izuva rekuti musangano uyu ungaitwa riinhi sezvo pachiri pakutangisisa kwegore sezvo vamwe vanofanirwa kunge vachipinda misangano iyi vasati vadzoka kubva kumazororo.
Facebook Forum